12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Ամերիկյան նավթային հսկա «Chevron»-ը փակում է Ադրբեջանում իր ներկայացուցչությունն ու հեռանում երկրից
Քաղաքականություն
23.07.2021 | 12:14
Ամերիկյան նավթային «Chevron» ընկերությունը հայտարարել է Ադրբեջանում իր ներկայացուցչության լուծարման մասին։ Այս մասին «Ինտերֆաքս Ադրբեջանին» հայտնել են ընկերությունից։
«Ադրբեջանում Chevron BTC Pipeline-ի ներկայացուցչության լուծարման հետ կապված՝ պարտատերերից պահանջները ընդունվում են երկու ամսվա ընթացքում»,-լրատվամիջոցին հայտնել են ընկերությունից։ Ներկայում ընկերությունը Ադրբեջանում ոչ մի նախագծի չի մասնակցում, այնինչ նախկինում այն բաժնեմասեր ուներ Ազերի-Չիրագ-Գյունեշլի նավթահանքում ու Բաքու-Թբիլիսի-Ջեյհան նավթամուղում։
Նշենք, որ «Chevron»-ը 2019թ-ի նոյեմբերի 4-ին հունգարական MOL ընկերության հետ համաձայնագիր ստորագրեց՝ Ադրբեջանում իր ակտիվները վաճառելով 1․57 մլրդ դոլարով։ Խոսքը Ազերի-Չիրագ-Գյունեշլիում 9․57 տոկոս և Բաքու-Թբիլիսի-Ջեյհանում ՝ 8․9 տոկոս բաժնեմասերի վաճառքի մասին է։
Հավելենք, որ ամերիկյան նավթարդյունահանող մեկ այլ խոշոր ընկերություն՝ Exxon Mobil ընկերությունը ևս մտադիր է հեռանալ Ադրբեջանից։ Ընկերությունը 2018 թվականին արդեն փորձել է վաճառել Ազերի-Չիրագ-Գյունեշլիում ունեցած 6.8 տոկոսանոց մասնաբաժինը: Տարբեր հրապարակումների համաձայն՝ Exxon Mobil-ը վերսկսել է իր մասնաբաժնի վաճառքի գործընթացը։ Ակտիվների նկատմամբ հետաքրքրություն են ցուցաբերում հատկապես ասիական ընկերությունները։
Ի դեպ, «Exxon»-նն ու «Chevron»-ը այն ամերիկյան նավթային ընկերությունների շարքում են, որոնք օգնեցին Ադրբեջանին ձևավորել նավթարդյունաբերական ենթակառուցվածքները Խորհրդային միության փլուզումից հետո և 1994 թվականին Ազերի-Չիրագ-Գյունեշլիի բաժնետոմսեր ձեռք բերեցին: Այս գործարքը Ադրբեջանի ու գործընկերների կողմից անվանվեց «դարի պայմանագիր»։
Էմմա Չոբանյան
