21.07.2026 | 14:33
Իրանը հայտարարել է Բահրեյնի ավիաբազայի ամերիկյան թիրախների վրա հարձակման մասին
Մեզ անհանգստացնում են Երասխի մերձակայքում միջադեպերը, կողմերին հորդորում ենք հնարավորինս շուտ վերադառնալ ՄԽ-ի գլխավորած բանակցություններին․ ԱՄՆ պետքարտուղարություն
Քաղաքականություն
22.07.2021 | 19:28
Մեզ անհանգստացնում են վերջերս Հայաստանի և Ադրբեջանի սահմանի երկայնքով՝ Երասխ/Սադարակի մերձակայքում գրանցված միջադեպերը: Այսպես են պատասխանել ԱՄՆ-ի պետքարտուղարությունից՝ արձագանքելով Factor.am-ի հարցմանը, թե նկատի ունենալով Հայաստանի և Ադրբեջանի սահմանի երկայնքով, մասնավորապես՝ Երասխի հատվածում տեղի ունեցողը՝ ԱՄՆ-ն ինչպես է տեսնում իրավիճակի լուծումը։
Նշենք նաև, որ ԱՄՆ-ի պետքարտուղարությունից հետաքրքրվել էինք, թե ինչպես են վերաբերվում խոսակցություններին, ըստ որոնց՝ հնարավոր է, որ ԵԱՀԿ Մինսկի խմբի բոլոր համանախագահ երկրները ներգրավվեն արցախյան պատերազմի հրադադարի եռակողմ պայմանագրի իրականացման գործընթացում։
«Միացյալ Նահանգները՝ որպես ԵԱՀԿ Մինսկի խմբի համանախագահ երկիր, խորապես հավատարիմ է բոլոր կողմերի հետ աշխատանքին ՝ Լեռնային Ղարաբաղի հակամարտության երկարաժամկետ քաղաքական կարգավորմանը հասնելու համար։ Մենք կողմերին հորդորում ենք հնարավորինս շուտ վերադառնալ Մինսկի խմբի համանախագահության գլխավորած բանակցություններին»,- նշված է պետքարտուղարության ամբողջական պատասխանում։
Հիշեցնենք՝ հուլիսի 19-ին ադրբեջանական զինված ուժերը մի քանի ժամ շարունակ տարբեր տրամաչափի հրաձգային զինատեսակներից գնդակոծել են հայ-ադրբեջանական սահմանի Երասխի հատվածում տեղակայված հայկական դիրքերը: Պարբերաբար կիրառվել են նաև ականանետներ։ Հակառակորդի արձակած կրակոցից ուսի հատվածում վնասվածք է ստացել Երասխ համայնքի ղեկավար Ռադիկ Օղիկյանը:
