05.05.2024 | 21:52
7 ոսկի և 2 արծաթ. Հայաստանի հավաքականը ավարտեց ելույթները ուշուի ԵԱ-ում
ՄԻԵԴ-ն Ադրբեջանին պարտավորեցրել է գերությունից ազատ արձակված Արթուր Բադալյանին վճարել 30 հազար եվրո
Հասարակություն
22.07.2021 | 16:53
Մարդու իրավունքների եվրոպական դատարանը հրապարակել է հերթական վճիռն ընդդեմ Ադրբեջանի։ Դատարանն արձանագրել է, որ Ադրբեջանը խոշտանգել և ապօրինի ազատությունից զրկել է ՀՀ քաղաքացի Արթուր Բադալյանին, որը մոլորվել և հայտնվել էր Ադրբեջանի տարածքում: Եվրոպական դատարանը Ադրբեջանին պարտավորեցրել է դիմումատուին վճարել 30.000 եվրո՝ որպես ոչ նյութական վնասի հատուցում:
Ըստ գործի՝ 2009 թվականի մայիսի 9-ին Բադալյանն անհետացել և գերեվարվել է ադրբեջանական ուժերի կողմից: Նրա գտնվելու վայրը անհայտ է եղել ընտանիքի և Հայաստանի իշխանությունների համար մինչև 2010 թվականի նոյեմբերի 5-ը, երբ Կարմիր խաչի միջազգային կոմիտեի կողմից գրանցվել է որպես Ադրբեջանում պահվող հայ գերի: 2011 թվականին մարտի 17-ին գերիների փոխանակման շրջանակներում նա ազատ է արձակվել։
Դիմումատուն ՄԻԵԴ-ին ներկայացրել է, որ ադրբեջանական ուժերի կողմից գերեվարվելուց հետո 22 ամիս գերության մեջ է եղել տարբեր ռազմական հաստատություններում: Նա պնդել է, որ իրեն բավարար քանակությամբ սնունդ չեն տվել և հաճախ թույլ չեն տվել զուգարան գնալ: Ավելին, ենթարկել են դաժան խոշտանգումների և հոգեկան տառապանքի․ հաճախ են հարվածել ոտքերին, որպեսզի չկարողանա զգալ կամ շարժել դրանք, հաճախակի էլեկտրական լարեր են կապել նրա մատներին և հոսանքահարել: Բադալյանի խցի դռանը հարվածել են մետաղական առարկաներով, ինչի հետևանքով նա այժմ տառապում է լսողության խանգարմամբ:
Այսպիսով, Արթուր Բադալյանը՝ ընդդեմ Ադրբեջանի Հանրապետության դիմել էր ՄԻԵԴ՝ Մարդու իրավունքների և հիմնարար ազատությունների պաշտպանության մասին կոնվենցիայի 34-րդ հոդվածի համաձայն: ՄԻԵԴ-ն էլ միաձայն ընդունել է հայցադիմումը:
Դատարանն արձանագրել է, որ տեղի է ունեցել Կոնվենցիայի 3-րդ և 5-րդ հոդվածների խախտումներ՝ խոշտանգումների արգելում և ազատության, անձնական անձեռնմխելիության իրավունքների խախտում:
ՄԻԵԴ-ը պարտավորեցրել է Ադրբեջանին վճռի վերջնական դառնալու օրվանից երեք ամսվա ընթացքում դիմումատուին՝ Բադալյանին, վճարել 30 000 եվրո:
