15.01.2025 | 16:47
Արդյո՞ք չեն հակասում ԵՏՄ-ի և ՀԱՊԿ-ի հանդեպ պարտավորություններին․ Կարասինը՝ ՀՀ-ԱՄՆ ռազմավարական գործընկերության փաստաթղթի մասին
«Թիկունքը մշակույթ, սահմանը՝ կենտրոն» ծրագրի շրջանակում ընտրել ենք երեք մարզ․ Արմեն Սարգսյան. ՏԵՍԱՆՅՈՒԹ
Մշակույթ
22.07.2021 | 11:59
Հայաստանի սահմանամերձ համայնքներում և Արցախում մշակութային կյանքն ակտիվացնելու նպատակով իրականացվում է «Թիկունքը մշակույթ, սահմանը՝ կենտրոն» խորագրով ծրագիրը, որի շրջանակում Հայաստանի երգի պետական թատրոնը ելույթներ կունենա Սյունիքի, Գեղարքունիքի և Տավուշի մարզերում:
Այս մասին հուլիսի 22-ին լրագրողների հետ հանդիպմանն ասաց Երգի պետական թատրոնի տնօրեն Արմեն Սարգսյանը:
Նա հիշեցրեց, որ երկու տարի է՝ թատրոնը հիմնանորոգման փուլում է, որը գրեթե ավարտին են հասցնում: Նորոգվում են դահլիճը, ճեմասրահը, մի քանի հարկ ևս, ուստի համերգները կազմակերպվում են այլ հարթակներում: «Այս տարի նշում ենք Առնո Բաբաջանյանի 100-ամյակը, և տարին հայտարարեցինք բաբաջանյանական: Նրան նվիրված համերգային ծրագրով ենք հանդես եկել Երևանում և նույն ծրագրով լինելու ենք Հայաստանի սահմանամերձ համայնքներում: Կատարելու ենք նաև Արթուր Գրիգորյանի ստեղծագործությունները»,- նշեց Սարգսյանն ու տեղեկացրեց, որ Սյունիքում հանդես են գալու օգոստոսի 13-16-ը: Ելույթ են ունենալու Մեղրիում, Կապանում, Դարպասում, օգոստոսի 5-9-ը՝ Տավուշի մարզում՝ Բերդում, Բերդավանում, Ազատամուտում: Բերդավանում երկու համերգ ունեն. այնտեղ զորամաս կա և հանդես են գալու նաև զինվորների համար, իսկ Գեղարքունիքի մարզում կլինեն հուլիսի 29-30-ին՝ Մարտունիում և Վարդենիսում:
Արմեն Սարգսյանի խոսքով՝ բոլոր համերգներից առաջ տվյալ համայնքների բնակիչներին կցուցադրեն թատրոնի նկարիչ Նարեկ Տերյանի ստեղծագործությունների ցուցահանդեսը: Թատրոնի տնօրենը հույս հայտնեց, որ համերգային երեկոները լավ կանցնեն:
