Ուգանդացի ծանրորդ Ջուլիուս Սեկիտելեկոն, որն ազգային թիմի հետ ժամանել էր Տոկիոյի Օլիմպիական խաղերին, իսկ ավելի ուշ անհետացել էր, հայտնաբերվել է Միեի պրեֆեկտուրայում: Այս մասին հայտնում է Kyodo-ն: Այլ մանրամասներ դեռ հայտնի չեն. փոխանցում է armsport-ը:
20-ամյա մարզիկի անհետացման մասին հայտնի դարձավ հուլիսի 16-ին: 67 կգ քաշային կարգը ներկայացնող ծանրորդը մարզվել է Օսակա պրեֆեկտուրայում: Մարզիկի հետ փորձել են կապ հաստատել, որպեսզի նրանից կորոնավիրուսի թեստ վերցնեն, բայց հնարավոր չի եղել պարզել Սեկիտելեկոյի գտնվելու վայրը: Քաղաքային իշխանությունները հայտնել են, որ վերջին անգամ նրան տեսել են հյուրանոցում:
Ճապոնիա ժամանելուց հետո Ուգանդայի հավաքականը ժամանակավորապես տեղակայվել է երկրի հարավ-արևմուտքում գտնվող Իզումիսանա քաղաքում (Օսակա պրեֆեկտուրա): Ավելի վաղ ազգային հավաքականի երկու մարզիկների մոտ ախտորոշվել էր կորոնավիրուս:
Տոկիոյի Օլիմպիական խաղերը կընթանան հուլիսի 23-ից օգոստոսի 8-ը:
