Քաղաքականություն
19.07.2021 | 15:11
Հորդառատ անձրևները, որոնք ջրհեղեղների էին հանգեցրել Գերմանիայի արևմուտքում, դադարել են, ջուրը սկսել է աստիճանաբար նահանջել: Սակայն տարերային աղետի զոհերի թիվը շարունակում է աճել: Ըստ վերջին պաշտոնական տվյալների՝ 157 մարդ է զոհվել: Ավելի քան երեսուն մարդ էլ զոհվել է հարևան Բելգիայում, գրում է BBC-ի ռուսական ծառայությունը:
Շատերը դեռևս անհետ կորած են, ուստի զոհերի թիվը, ամենայն հավանականությամբ, վերջնական չէ: Հանգստյան օրերին գերմանացի առաջատար քաղաքական գործիչներն այցելել են աղետից առավել տուժած տարածքներ՝ խոստանալով անհապաղ ֆինանսական օգնություն ցուցաբերել՝ հետևանքները վերացնելու համար:
Գերմանիայի կանցլեր Անգելա Մերկելը, որը կիրակի այցելել էր Ռայնլանդ-Պֆալց նահանգի Շուլդ գյուղ, իրավիճակն անվանել է սարսափեցնող: Այս մարզը ջրհեղեղներից առավել տուժածներից մեկն է: Մերկելը հավաստիացրել է, որ չորեքշաբթի իր նախարարների կաբինետը հավանություն կտա ինչպես արտակարգ ֆինանսական օգնության փաթեթին, ինչը երկրին կարժենա հարյուրավոր միլիոն եվրո, այնպես էլ ավելի երկարատև օգնությանը, որը, ամենայն հավանականությամբ, կկազմի մի քանի միլիարդ եվրո։
BBC-ի հաղորդմամբ՝ այս շրջաններում բազմաթիվ ճանապարհներ հեղեղված են, կամուրջները՝ փլուզված, և մինչ օրս պարզ չէ, թե քանի մարդ է մնացել առանց տանիքի կամ զրկվել իր ողջ ունեցվածքից։
Չնայած շատ շրջաններում ջուրն արդեն սկսել է նահանջել, սակայն իշխանությունները շարունակում են գտնվել բարձր պատրաստվածության վիճակում:
Այս հանգստյան օրերին Գերմանիայի օդերևութաբանական ծառայությունը նախազգուշացում է արել նաև հարավ-արևելյան Բավարիայում եղանակի վատթարացման մասին։ Այստեղ մտավախություն կա, որ հունից դուրս կգա Դանուբ գետը: Վերին Բավարիայի շրջանում հորդառատ անձրեւների պատճառով հեղեղվել են տների նկուղներն ու ճանապարհները:
Տաթև Ֆռանգյան
