13.12.2024 | 16:07
Բլինքենը հայտարարել է, որ ԱՄՆ-ի և Թուրքիայի միջև ընդհանուր համաձայնության կա Սիրիայում կարգավորման շուրջ
Էրդողանն անդրադարձել է Ստամբուլի հայկական Սուրբ Թագավոր եկեղեցու պարսպին պարելու միջադեպին
Քաղաքականություն
13.07.2021 | 13:35
Թուրքիայի նախագահ Ռեջեփ Թայիփ Էրդողանն անդրադարձել է Ստամբուլի Քադըքյոյ թաղամասի հայկական Սուրբ Թագավոր եկեղեցու պարսպին երիտասարդների պարելու միջադեպին, հայտնում են թուրքական լրատվամիջոցները։
«Եկեղեցու պատին ցուցադրված անհարգալից վերաբերմունքը ես տեսնում եմ որպես սադրանք՝ ընդդեմ մեր միասնության ու համերաշխության տոնական այս օրերին: Մեր բոլոր հայրենակիցների կրոնական ազատությունը պաշտպանելը մեր պարտքն է»,- հայտարարել է Էրդողանը։
Հիշեցնենք՝ Ստամբուլի Քադըքյոյ թաղամասում մի քանի երիտասարդներ բարձրացել էին հայկական Սուրբ Թագավոր եկեղեցու մուտքի պատին ու սկսել պարել։ Նրանց մասնակցությամբ տեսանյութը համացանցում արագորեն տարածում է գտել՝ տարաբնույթ քննադատությունների տեղիք տալով։
Ստամբուլի նահագապետարանը նախօրեին հայտարարություն է տարածել, որ եկեղեցու պատին պարողները ձերբակալվել են։
«Երեք քաղաքացիները, որոնք մասնակցել են այդ գործողությանը, ձերբակալվել են։ Հետաքննություն է սկսվել։ Մենք դատապարտում ենք սրբավայրերի նկատմամբ այս նողկալի պահվածքը»,- ասվում է հաղորդագրության մեջ։
Այս միջադեպին անդրադարձել է նաև Թուրքիայի Մեջլիսի հայազգի պատգամավոր Գարո Փալյանը՝ դատապարտելով երիտասարդների արարքն ու ՆԳ նախարարությանը կոչ արել՝ հետաքննություն սկսել տեղում աշխատող ոստիկանների նկատմամբ։
Թուրքիայի իշխող «Արդարություն ու զարգացում» կուսակցության մամուլի խոսնակ Օմեր Չելիքը նույնպես դատապարտել է այս գործողությունը։
«Մենք դատապարտում ենք Սուրբ Թագավոր եկեղեցու նկատմամբ անարգանքի այս գործողությունը։ Նման ակցիաները՝ ուղղված մզկիթների, եկեղեցիների, սինագոգների դեմ, անհարգանք են բոլորի հանդեպ, մենք այն գնահատում ենք որպես սադրանք»,- թվիթերյան իր էջում գրել էր Չելիքը։
Էմմա Չոբանյան
