20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Ստամբուլում հայկական Սուրբ Թագավոր եկեղեցու պատին պարողները ձերբակալվել են
Քաղաքականություն
12.07.2021 | 14:19
Ստամբուլի Քադըքյոյ վարչական շրջանում հայկական Սուրբ Թագավոր եկեղեցու պատին պարող տղամարդիկ ձերբակալվել են։ Այս մասին նշվում է քաղաքի վարչակազմի հայտարարություն մեջ, գրում է ՌԻԱ Նովոստին։
«Երեք քաղաքացիները, որոնք մասնակցել են այդ գործողությանը, ձերբակալվել են։ Հետաքննություն է սկսվել։ Մենք դատապարտում ենք սրբավայրերի նկատմամբ այս նողկալի պահվածքը»,- ասվում է հաղորդագրության մեջ։
Հիշեցնենք՝ նախօրեին մի խումբ երիտասարդներ փողոցում պարեր էին կազմակերպել այն շրջանում, որտեղ գտնվում է հայկական եկեղեցին։ Մի քանի տղամարդ բարձրացել է եկեղեցու պարսպին ու պարել։ Նրանց մասնակցությամբ տեսանյութը լայն տարածում է գտել համացանցում։
Թուրքիայի իշխող «Արդարություն ու զարգացում» կուսակցության մամուլի խոսնակ Օմեր Չելիքը նույնպես դատապարտել է այս գործողությունը։
«Մենք դատապարտում ենք Սուրբ Թագավոր եկեղեցու նկատմամբ անարգանքի այս գործողությունը։ Նման ակցիաները՝ ուղղված մզկիթների, եկեղեցիների, սինագոգների դեմ, անհարգանք են բոլորի հանդեպ, մենք այն գնահատում ենք որպես սադրանք»,- թվիթերյան իր էջում գրել է Չելիքը։
Նշենք, որ այս միջադեպին ավելի վաղ անդրադարձել էր նաև Թուրքիայի Մեջլիսի հայազգի պատգամավոր Գարո Փալյանը՝ դատապարտելով երիտասարդների արարքն ու ՆԳ նախարարությանը կոչ արել՝ հետաքննություն սկսել տեղում աշխատող ոստիկանների նկատմամբ։
Էմմա Չոբանյան
