11.10.2026 | 18:49
Թրամփը կրկին հայտարարել է, որ Ռուսաստանն ու Ուկրաինան համաձայնության են եկել էներգետիկ հրադադարի շուրջ
Կուբայում հակակառավարական բողոքի ցույցեր են բռնկվել․ նման զանգվածային ցույցեր վերջին անգամ 30 տարի առաջ են գրանցվել
Քաղաքականություն
12.07.2021 | 13:58
Կուբայի մայրաքաղաք Հավանայում և մի շարք այլ քաղաքներում բազմահազարանոց բողոքի ցույցեր են տեղի ունեցել ընդդեմ կոմունիստական կառավարության: Ցուցարարները պահանջում են ազատություն, ժողովրդավարություն և ավելի վճռական գործողություններ կորոնավիրուսի համաճարակի դեմ պայքարում: Ցուցարարները «Վե՛րջ բռնապետությանը», «Մենք չենք վախենում» կարգախոսներ են հնչեցրել, գրում է BBC-ի ռուսական ծառայությունը:
Վերջին օրերին երկրում գրանցվել է կորոնավիրուսային վարակի դեպքերի ռեկորդային թիվ։ Մարդիկ պահանջում են իշխանություններից՝ արագացնել պատվաստման գործընթացը։
Անցյալ շաբաթ Կուբան հաստատել է իր սեփական՝ Աբդալա 2 պատվաստանյութը: Այն Լատինական Ամերիկայում և Կարիբյան ավազանում մշակված առաջին պատվաստանյութն է:
Այնուամենայնիվ, ցուցարարներն ասում են, որ բողոքի ցույցերի պատճառը միայն համաճարակը չէ: Նրանք վրդովված են էլեկտրաէներգիայի և սննդի աճող դեֆիցիտից:
Կուբայում հակակառավարական ցույցեր հազվադեպ են լինում: Նման զանգվածային բողոքի ցույցեր վերջին անգամ տեղի են ունեցել գրեթե 30 տարի առաջ:
Նախագահ Միգել Դիաս-Կանելին մեղադրել է ԱՄՆ-ին և կուբա-ամերիկյան մաֆիային կղզում իրավիճակը թեժացնելու մեջ: ԱՄՆ ազգային անվտանգության հարցերով խորհրդական Ջեյք Սալիվանն իր աջակցությունն է հայտնել ցուցարարներին:
«ԱՄՆ-ն աջակցում է Կուբայում խոսքի և հավաքների ազատությունն ու դատապարտելու է ցանկացած բռնություն խաղաղ ցուցարարների նկատմամբ, որոնք օգտագործում են իրենց համընդհանուր իրավունքները»,- ասվում է Սալիվանի Twitter-ում արված գրառման մեջ:
Reuters գործակալության տվյալներով՝ Հավանայում նկատվել են ուժայինների ավտոմեքենաներ, որոնք հագեցած են եղել գնդացիրներով։
Դիաս-Կանելը կոչ է արել կոմունիստներին՝ փողոց դուրս գալ և հակահարված տալ ցուցարարներին։ Նրա խոսքով՝ եկել է հեղափոխությունը պաշտպանելու ժամանակը։
«Մենք պատրաստ ենք մեր կյանքը տալ։ Նրանք պետք է անցնեն մեր դիերի վրայով, եթե ցանկանում են հանդիպել հեղափոխության հետ։ Մենք պատրաստ ենք ամեն ինչի և կկռվենք փողոցներում»,- հայտարարել է Դիաս-Կանելը հանրային հեռուստաընկերության եթերում։
Տաթև Ֆռանգյան
