Հայիթիում ձերբակալել են երկրի նախագահի սպանության հավանական կազմակերպչին․ AP

Հայիթիում իրավապահ մարմինների աշխատակիցները ձերբակալել են ֆլորիդաբնակ 60-ամյա հայիթցի Քրիստիան Էմմանուել Սանոնին՝ նախագահ Ժովենել Մոիզի սպանության կասկածանքով։ Այս մասին  հայտնում է AP-ն։

Հայիթիի ոստիկանության ղեկավար Լեոն Շառլի խոսքով՝ Մոիզի վրա հարձակումից հետո առաջինը, ում զանգահարել են հանցագործները, եղել է Սանոնը։ Շառլը հայտարարել է, որ Սանոնը համագործակցել է նրանց հետ, ովքեր կազմակերպել ու իրականացրել են սպանությունը։

Սանոնի բնակության վայրում կատարված խուզարկության արդյունքում ոստիկանությունը հայտնաբերել է ԱՄՆ թմրանյութերի դեմ պայքարի վարչության պատկերանշանով գլխարկ, 20 տուփ փամփուշտ, հրազենի մասեր, Դոմինիկյան հանրապետության չորս պետհամարանիշ և անհայտ անձանց հետ նամակագրություն:

Բացահայտվել է, որ Սանոնը կապի մեջ է եղել ԱՄՆ-ում գործող վենեսուելական անվտանգություն ապահովող ծառայություններ մատուցող ընկերության հետ, որն էլ, հավանաբար, կազմակերպել է Մոիզին սպանած նախկին կոլումբիացի զինվորականների հավաքագրումը: Ի սկզբանե նախատեսվում էր, որ նախկին զինվորականները պետք է ապահովեին Սանոնի անվտանգությունը, երբ նա մասնավոր չվերթով ժամաներ Հայիթի: Սակայն նրանք այնուհետև ստացել են այլ հրաման՝ ձերբակալել նախագահ Մոիզին:

Շառլը նշել է, որ հանցագործության դրդապատճառներն ակնհայտորեն քաղաքական են եղել, քանի որ բժիշկ ներկայացող Սանոնը երկրի իշխանություններին բազմից մեղադրել է կոռուպցիայի մեջ։

Հիշեցնենք, որ Հայիթիի նախագահի նստավայրի վրա հարձակման հետևանքով սպանվել էր երկրի ղեկավարը, իսկ առաջին տիկինը՝ վիրավորվել։ Որոշ լրատվամիջոցներում տեղեկություններ հայտնվեցին, որ առաջին տիկինը ևս մահացել է հիվանդանոցում, սակայն այդ լուրերը հերքվել են։ Այժմ տեղեկացվում է, որ Մոիզի կնոջը՝ Մարթինին, շաբաթ վիրահատել են, ինչից հետո վերջինն իրեն լավ է զգում։

Հայիթիի իշխանությունները դիմել էին ԱՄՆ-ին՝ խնդրելով զորք մտցնել երկիր՝ երկրի ղեկավարի սպանությունից հետո գլխավոր ենթակառուցվածքները պաշտպանելու համար, սակայն ԱՄՆ-ը մերժել է այս առաջարկը։

Տաթև Ֆռանգյան