ԵՐԵՎԱՆԻ ԺԱՄԱՆԱԿՈՎ. Նիկոլ Փաշինյանի հումորային արձագանքն ու Տարոն Մարգարյանի կողմնակիցների վիրավորանքները․ Մարիաննա Գրիգորյանը բացահայտումներ է անում (ՏԵՍԱՆՅՈՒԹ)

«Շատ պաշտոնյաներ հումորով են վերաբերվում իրենց ծաղրանկարներին, բացահայտ դրական ձևով իր ծաղրանկարին արձագանքել է, օրինակ, Նիկոլ Փաշինյանը՝ ցույց տալով, որ ունի հումորի զգացում, իսկ, օրինակ, Արմեն Աշոտյանը ժամանակին արտահայտվել է, որ նույնացնում է մեզ «Շառլի Էբդոյի» հետ։

Բացի այդ՝ որոշ պաշտոնյաների հարազատներ սոցցանցերում վիրավորական մեկնաբանություններ են թողնում մեր աշխատանքների առթիվ, օրինակ՝ շատ ակտիվ են քաղաքապետարանի աշխատակիցները՝ Տարոն Մարգարյանի ծաղրանկարների հետ կապված դեպքերում»,-ասում է «Մեդիալաբի» տնօրեն և գլխավոր խմբագիր Մարիաննա Գրիգորյանը՝ Factor.am-ի «Երևանի ժամանակով» զրուցաշարի շրջանակում։

Նրա խոսքով՝ եթե, օրինակ, տասը տարի առաջ դաշտում ազատ ստեղծագործողների նկատմամբ նկատելի էին ակնհայտ բռնություններ, հիմա, կարելի է ասել, վերահսկողությունն է գերիշխողը: «Նույնիսկ երիտասարդ քաղաքական գործիչների մոտ անհասկանալի ձևով շարունակվում է գերիշխել սովետական մտածելակերպը։ Քաղաքական գործիչների լայնախոհության մասին խոսք լինել չի կարող, հատկապես, եթե հաշվի առնենք, թե, օրինակ, եվրոպական երկրներում պաշտոնյաներն ինչ հումորով են արձագանքում իրենց ծաղրանկարներին, իրենց մասին նյութերին։ Այս առումով Հայաստանում երկար ճանապարհ ունենք անցնելու»,- ասում է մեր զրուցակիցը։

Նա մտահոգություն է հայտնում հանրության շրջանում տիրող վախի մթնոլորտի առնչությամբ․ «Մեր ցուցահանդեսների շրջանակում այցեր ենք կատարել մարզեր և ինձ շատ մտահոգել է տեղացիների շրջանում գերիշխող վախը, շատերն ուզում էին մոտենալ մեզ, արձագանքել, բայց հապաղում էին։ Այդ առումով ամենաազատը Վանաձորն էր, որտեղ մարդիկ շատ ոգևորված էին։ Բայց, ընդհանուր առմամբ, շատերի շրջանում տարածված է այն մտայնությունը, որ իրենք այս իրականությունում ոչինչ չեն կարող փոխել»։

Նա անդրադառնում է նաև ՀՀ կառավարության նիստերը դռնփակ անցկացնելու որոշմանն ու Երևանի ավագանու նիստերին լրագրողների մուտքն արգելելու մասին քննարկումներին: «Եթե կառավարությունը նորմալ աշխատում է, թաքցնելու բան չունի, չպետք է վախենա լրագրողների ներկայությունից։ Սա հիշեցնում է Սերժ Սարգսյանի գործելաոճը, նրա ասուլիսներին ներկա են լինում սահմանափակ թվով լրագրողներ, հարցերը զտվում են, ուղիղ հեռարձակում չի լինում։ Հիմա ես տեսնում եմ այդ գործելաոճը կառվարություն բերելու միտում։ Սակայն դռներ փակելով որևէ հարց չի լուծվելու, դրանից կառավարությունն ավելի լավը չի դառնալու»,-շեշտում է «Մեդիալաբի» գլխավոր խմբագիրը։

Մանրամասները՝ տեսանյութում։

Աննա Բաբաջանյան