16.02.2026 | 00:04
Հայաստանի գեղասահորդները հաջող մեկնարկեցին Օլիմպիական խաղերում․ ՏԵՍԱՆՅՈՒԹ
Թալիբները հայտարարել են, որ ՌԴ-ի հետ քննարկում են Տաջիկստանի սահմանի հարցը
Քաղաքականություն
09.07.2021 | 13:52
«Թալիբան» շարժումը Ռուսաստանի հետ քննարկում է Տաջիկստանի սահմանամերձ շրջաններին վերաբերող հարցեր, նրանք վստահեցրել են, որ սպառնալիքներ չեն ստեղծի։ Այս մասին հայտարարել է «Թալիբան» շարժման ներկայացուցիչ Սուհեյլ Շահինը, գրում է ՌԻԱ Նովոստին:
«Մենք նրանց հետ (ռուսական կողմի) մշտական կապի մեջ ենք»,- ասել է Շահինը Մոսկվայում կայացած մամուլի ասուլիսի ժամանակ՝ հավելելով, որ շարժումը վստահեցնում է, որ սահմանի խնդրով անհանգստանալու կարիք չկա:
Հիշեցնենք՝ երեկ Մոսկվա է ժամանել «Թալիբան»-ի պատվիրակությունը: Ռուսաստանի ԱԳՆ-ում բանակցությունների ժամանակ, ռուսական աղբյուրների համաձայն, շարժման ներկայացուցիչները ռուս դիվանագետներին վստահեցրել են, որ մտադիր չեն խախտել Կենտրոնական Ասիայի երկրների սահմանները:
Աֆղանստանի և Տաջիկստանի սահմանին «Թալիբան»-ի աճող ակտիվության պատճառով լարված իրավիճակ է ստեղծվել: Թալիբների ճնշման տակ աֆղանական բանակի զինվորականներն անցել են Տաջիկստանի հետ սահմանը: Պաշտոնական Մոսկվան և Հավաքական անվտանգության պայմանագրի կազմակերպությունը հայտարարել են Դուշանբեին օգնելու պատրաստակամության մասին:
Տաթև Ֆռանգյան
