ԵՄ հանձնակատարը Բաքվում հանդիպել է ադրբեջանցի պաշտոնյաների հետ․ ԼՈՒՍԱՆԿԱՐՆԵՐ

Բաքվում գտնվող ԵՄ Հարևանության ու ընդլայնման հարցերով հանձնակատար Օլիվեր Վարհեյն այսօր հանդիպել է Ադրբեջանի նախագահի աշխատակազմի ղեկավար Սամիր Նուրիևի ու նախագահի օգնական Հիքմեթ Հաջիևի հետ։ Ադրբեջանական լրատվամիջոցները, վկայակոչելով նախագահի աշխատակազմի հայտարարությունը, հաղորդրում են, որ հանդիպմանը նշվել է, թե ԵՄ-ի ու Ադրբեջանի միջև հարաբերությունները հաջողությամբ զարգանում են և Բաքուն ԵՄ-ի հուսալի գործընկերն է։

Հանդիպմանը կարծիքներ են փոխանակվել տրանսպորտի, կանաչ էներգետիկայի, թվային տեխնոլոգիաների, գիտության, կրթության և այլ որոտում համագործակցության հեռանկարների վերաբերյալ։ Նշվել է, որ ԵՄ-ն պատրաստ է աջակցել Ադրբեջանի՝ Արցախի գրավյալ տարածքների ականազերծման, վերականգնման ջանքերին։

Կարևորվել է նաև TAP ծրագրի նշանակությունը ԵՄ-ի էներգետիկ անվտանգության համար։

Օլիվեր Վարհեյն էլ թվիթերյան իր միկրոբլոգում է գրառում արել հանդիպման մասին՝ նշելով, որ կողմերը կարծիքներ են փոխանակել տնտեսական ու ներդրումային ծրագրի իրագործման վերաբերյալ։

«Մենք նաև խոսել ենք COVID-19-ի հետ կապված մարտահրավերների արձագանքման միջոցների մասին»,- գրել է Վարհեյնը։

Գրառումներից մեկով էլ Վարհեյը հայտնել է, որ ԵՄ-ն պատրաստվում է աջակցել Բաքվի առևտրային նավահանգստին «Արևելյան գործընկերության» տնտեսական ու ներդրումային պլանի շրջանակում։

Երեկ ԵՄ պաշտոնյան հանդիպել է նաև Ադրբեջանի էկոնոմիկայի նախարար Միքայել Ջաբբարովին ու էներգետիկայի նախարար Փարվիզ Շահբազովին։ Այսօր սպասվում է նրա հանդիպում նաև Ադրբեջանի ԱԳ նախարար Ջեյհուն Բայրամովի հետ։

Նշենք, որ ԵՄ հանձնակատարը տարածաշրջանային այցով Հարավային Կովկասում է․ հուլիսի 7-ին նա այցելել էր Վրաստան, ապա՝ Ադրբեջան։ Հուլիսի 9-ին էլ նախատեսվում են Օլիվեր Վարհեյի հանդիպումները Հայաստանում։

Էմմա Չոբանյան