Այս պահի դրությամբ չենք կարող ասել՝ արդյոք ՀՀ-ում գրանցված է կորոնավիրուսի «դելտա» շտամ. ԱՆ Հիվանդությունների վերահսկման և կանխարգելման ազգային կենտրոնի «Ռեֆերենս լաբորատոր» կենտրոնում Factor TV-ի հարցին ի պատասխան՝ ասաց ԱՆ ՀՎԿԱԿ գլխավոր տնօրենի տեղակալ Գայանե Սահակյանը։
«Դեռ փորձարկման փուլում է, իսկ դա ժամանակատար է և որոշակի ընթացք է պահանջում։ Երբ պարզ լինեն արդյունքները՝ Առողջապահության նախարարությունը կհայտարարի»,- ընդգծեց Սահակյանը։
ՀՀ-ում կորոնավիրուսի դեմ պատվաստումների մեկնարկից ի վեր, հուլիսի 4-ի դրությամբ, կատարվել է 88 հազար 164 պատվաստում։ Անդրադառնալով պատվաստվածների ցածր ցուցանիշին՝ ԱՆ ՀՎԿԱԿ գլխավոր տնօրենի տեղակալը պնդեց, որ Առողջապահության նախարարությունն այս հարցում չի թերացել։
«Պարզապես մեզ մոտ նոր պատվաստանյութերի հանդեպ կա անվստահություն։ Հետագայում մարդիկ նայում են, եթե դիմացինին, հարևանին, հարազատին, ովքեր պատվաստվել են կորանավիրուսի դեմ, ոչինչ չի պատահել՝ ոգևորվում և գնում են պատվաստման։ Տեսանք, որ արդեն 80․000-ից ավելի պատվաստում իրականացվեց և ձնագնդի էֆեկտով ցանկացողների շրջանակը մեծացավ»,- նշեց Սահակյանը։
Մանրամասները՝ տեսանյութում։
Արփի Հակոբյան
