Քաղաքականություն
06.07.2021 | 19:58
Ադրբեջանի պետական նավթային նավթային SOCAR ընկերությունը 2020 թվականին կրել է 1․7 մլրդ մանաթի (շուրջ 1.02 մլրդ դոլար) մաքուր վնաս։ Այս մասին ասվում է ընկերության ֆինանսական հաշվետվության մեջ, որը ներկայացնում են ադրբեջանական լրատվամիջոցները։
Ըստ փաստաթղթի՝ 2020թ․-ին ընկերության եկամուտները կազմել են 49 մլրդ 607 մլն մանաթ, մաքուր վնասը՝ 1 մլրդ 734 մլն մանաթ։ 2020թ․-ին, 2019 թվականի համեմատ, SOCAR-ի եկամուտները կրճատվել են 40․8 տոկոսվ։
2020 թվականին ընկերության ընդհանուր ակտիվները գնահատվել են 64․2 մլրդ մանաթ, ընթացիկ ակտիվները՝ 18․3 մլրդ, երկարաժամկետ ակտիվները՝ 45․9 մլրդ մանաթ։ SOCAR-ի ընդհանուր կապիտալը հաշվետու տարում կազմել է 21․9 մլրդ մանաթ, կանխիկ միջոցները՝ 6․2 մլրդ։
Փաստաղթղթում նշվում է, որ 2020 թվականին, որը համաշխարհային նավթային պատմության մեջ կհիշվի որպես ամենաանհանգիստ շրջանը, ընկերությունը կարողացել է կրճատել հնարավոր մաքուր վնասները։ Նշվում է նաև, որ հաշվետու տարում ընկերության շրջանառությունը կազմել է 49․6 մլրդ մանաթ։ Շրջանառության նվազման վրա ազդել են համաշխարհային շուկայում նավթի ու գազի գների կտրուկ անկումը, ինչպես նաև նավթային ու նավթաքիմիական ապրանքների եկամուտների մարժայի նվազումը։
Նշվում է նաև, որ ընկերությունը համավարակի հետևանքներին բախվել է իր գործունեության այլ ոլորտներում ու այլ երկրներում, այդ թվում՝ թուրքական շուկայում, ինչպես նաև վնասներ է կրել տարադրամի փոխարժեքի տարբերության պատճառով։ Այս կորուստների թիվը գերազանցել է դրական արդյունքները, որոնք ձեռք են բերվել այլ ոլորտներում, ինչը հանգեցրել է վերջնարդյունքում կորուստների։
Էմմա Չոբանյան
