26.04.2026 | 15:53
Վթարային ջրանջատում Արմավիրի և Կոտայքի մարզերում
Բելառուսի նախագահի նախկին թեկնածու Բաբարիկոն դատապարտվել է 14 տարվա ազատազրկման
Քաղաքականություն
06.07.2021 | 13:24
Բելառուսի Գերագույն դատարանը երկրի նախագահի նախկին թեկնածու Վիկտոր Բաբարիկոյին դատապարտել է 14 տարվա ազատազրկման՝ ուժեղացված հսկողությամբ գաղութում։ Նրա նկատմամբ նաև տուգանք է կիրառվել, գրում է BBC-ի ռուսական ծառայությունը։
Քանի որ դատավճիռը կայացրել է Գերագույն դատարանը, այն բողոքարկման ենթակա չէ։
Վիկտոր Բաբարիկոն ձերբակալվել էր 2020 թվականի հունիսին՝ նախագահի թեկնածու առաջադրվելուց մեկ ամիս անց։ Մեղադրող կողմը պահանջում էր 15 տարվա ազատազրկում։
Բաբարիկոն մեղադրվում է կոռուպցիայի ու փողերի լվացման մեջ։ Նա չի ընդունում առաջադրված մեղադրանքները, սակայն Բաբարիկոյի ենթակաները, որոնք անցնում են այս գործով, հետաքննության հետ գործարքի մեջ են մտել ու խոստովանական ցուցմունքներ տվել։
Amnesty International իրավապաշտպան կազմակերպությունը Բաբարիկոյին ու «Բելգազպրոմբանկի գործով» անցնող մյուս դատապարտյալներին համարում է «խղճի բանտարկյալներ»։
Տաթև Ֆռանգյան
