08.09.2026 | 17:22
Հայկական ճարտարապետության նոր հասցեն․ Amanoo-ի միջազգային ճանապարհը
ԵՄ-ն նախատեսում է 500 միլիոն եվրո տրամադրել Հայաստանին փոքր ու միջին բիզնեսի զարգացման համար
Տնտեսություն
03.07.2021 | 20:02
ԵՄ-ն նախատեսում է 500 միլիոն եվրոյի աջակցություն տրամադրել փոքր ու միջին բիզնեսի 30.000 ներկայացուցիչներին։ Առաջնահերթությունը տրվելու է այն ձեռնարկություններին, որոնք աշխատում են բնությունը պահպանող տեխնոլոգիաներով, հատկապես շրջաններում, ինչպես նաև այն բիզնեսներին, որոնք առաջնորդում են կանայք:
Ինչպես ավելի վաղ տեղեկացրել էինք, ԵՄ-ն Սյունիքի մարզի զարգացման համար նախատեսում է տրամադրել 80 միլիոն եվրոյի աջակցություն, 120 միլիոն եվրո` «կանաչ» Երևանի համար։ Նորարարական տեխնոլոգիաների ու գիտության ոլորտում ԵՄ-ն նախատեսում է 300 միլիոն եվրոյի ներդրում կատարել։
Ծրագրերից ամենամեծը վերաբերում է Հյուսիս-Հարավ ճանապարհային միջանցքին․ նախատեսվում է 600 միլիոն եվրոյի աջակցություն տրամադրել մայրուղու դեռևս չկառուցված հատվածների, այդ թվում` Սիսիան-Քաջարան ճանապարհի, թունելների ու կամուրջների շինարարության համար։
Հայաստանից բացի, Եվրոպական հանձնաժողովը նույնատիպ ծրագրեր է մշակել նաև ԱլԳ անդամ մյուս երկրների` Վրաստանի, Ադրբեջանի, Մոլդովայի և Ուկրաինայի համար:
Ընդհանուր առմամբ, Հայաստանին կտրամադրվի 1.6 միլիարդ եվրո, Վրաստանին` 1.175 միլիարդ եվրո, իսկ Ադրբեջանին` 140 միլիոն եվրո:
Ակնկալվում է, որ այս ծրագրերը կքննարկվեն առաջիկա դեկտեմբերին` ԵՄ առաջնորդների և «Արևելյան գործընկերության» անդամների համատեղ գագաթնաժողովում:
Զեկույցն ամբողջությամբ` այստեղ:
