09.06.2026 | 00:17
Մարկո Ռուբիոն շնորհավորել է Փաշինյանին
ԱՄՆ-ը Թուրքիային ընդգրկել է մանկահասակ զինվորներին հակամարտությունների մասնակից դարձրած երկրների ցուցակում․ Reuters
Քաղաքականություն
02.07.2021 | 17:07
Ամերիկայի Միացյալ Նահանգները Թուրքիային ընդգրկել են այն պետությունների ցուցակում, որոնք անցած տարվա ընթացքում մասնակից են եղել երեխաներին որպես զինվորներ օգտագործելու մեջ։ Այսպիսով Թուրքիան դարձել է ՆԱՏՕ-ի անդամ առաջին երկիրը, որը հայտնվել է այս ցուցակում, ինչը, ամենայն հավանականությամբ, կբարդացնի առանց այն էլ բարդ Անկարա-Վաշինգտոն հարաբերությունները, գրում է Reuters-ը։
Միացյալ Նահանգների Պետդեպարտամենտը «Թրաֆիքինգը մարդկանց շրջանում» (TIP) 2021 թվականի զեկույցի շրջանակում հաստատել է, որ Թուրքիան «շոշափելի աջակցություն» է ցուցաբերում Սիրիայում գտնվող «Սուլթան Մուրադ» դիվիզիային, որը, Վաշինգտոնի տվյալներով, հավաքագրում և օգտագործում է մանկահասակ զինվորների։
Թուրքիան անմիջապես չի արձագանքել ԱՄՆ-ի այս քայլին:
Լրագրողների հետ ճեպազրույցում Պետդեպարտամենտի բարձրաստիճան պաշտոնյան անդրադարձել է նաև Լիբիայում երեխաներին որպես զինվորների ներգրավմանը ՝ ասելով, որ Վաշինգտոնը հույս ունի աշխատել Անկարայի հետ այդ խնդիրների լուծման ուղղությամբ:
«Հատկապես Թուրքիայի մասով … սա առաջին անգամն է, երբ ՆԱՏՕ-ի անդամը հայտնվում է մանկահասակ զինվորների ներգրավման ցուցակում», – ասել է Պետդեպարտամենտի պաշտոնյան: «Որպես տարածաշրջանում հարգված առաջնորդ և ՆԱՏՕ-ի անդամ՝ Թուրքիան հնարավորություն ունի անդրադառնալու Սիրիայում և Լիբիայում երեխաներին որպես զինվորների հավաքագրման և օգտագործման խնդրին », – հայտարարել է նա:
Հայտնի է, որ Թուրքիան «Իսլամական պետություն» ահաբեկչական խմբավորման և ԱՄՆ-ի աջակցությունը վայելող քրդական խմբավորումների դեմ իրականացրած գործողություններում, ինչպես նաև լիբիական հակամարտության շրջանակում, հաճախ է ներգրավել մանկահասակ զինվորների։
Տաթև Ֆռանգյան
