Քաղաքականություն
02.07.2021 | 16:30
Ղրղզստանն առաջարկում է ստեղծել միջտարածաշրջանային նոր պլատֆորմ, որը կմիավորի Կենտրոնական Ասիայի և Հարավային Կովկասի երկրները։ Այս մասին այսօր հայտարարել է Ղրղզստանի ԱԳ նախարար Ռուսլան Կազակբեկովը Բաքվում ադրբեջանցի գործընկերոջ՝ Ջեյհուն Բայրամովի հետ համատեղ մամուլի ասուլիում։
Ասուլիսին նախորդել են երկու երկրների ԱԳ նախարարների բանակցությունները, հաղորդում են ադրբեջանական լրատվամիջոցները։
«Մենք կարծում ենք, որ ժամանակն է օգտագործել բաց թողնված հնարավորությունները և հաստատել ռազմավարական գործընկերություն։ Մենք հանդես ենք գալիս հեռանկարում նոր միջտարածաշրջանային՝ Կենտրոնական Ասիա-Հարավային Կովկաս՝ 5+3 պլատֆորմի ստեղծման օգտին։ Առաջարկում ենք ակտիվացնել միջատարածաշրջանային երկխոսությունը»,- ասել է Ղրղզստանի ԱԳ նախարարը։
Նա նաև նշել է, որ Ադրբեջանն իրենց երկրի համար շատ կարևոր գործընկեր է։
Անդրադառնալով Լեռնային Ղարաբաղի հակամարտությանը՝ Ռուսլան Կազակբաևը կարծիք է հայտնել, որ այն լուծված է։
«Ղարաբաղի խնդրի լուծումը տարածաշրջանին զարգացման խթան կհաղորդի»,- նշել է Ղրղզստանի ԱԳ նախարարը։
Հավելենք, որ Ղրղզստանը ներառված է Հայաստանի հետ երկու տարածաշրջանային կազմակերպությունում՝ ՀԱՊԿ-ում և ԵՏՄ-ում։ Փաստացի, երկու երկրները համարվում են դաշնակիցներ, սակայն մայիսի 12-ից, երբ ադրբեջանական ԶՈՒ-ն ներխուժել է ՀՀ սուվերեն տարածք, Ղրղզստանի իշխանությունները որևէ հայտարարություն չեն արել, նույնիսկ ՀՀ-ի կողմից ՀԱՊԿ-ին պաշտոնապես դիմելուց հետո։
Էմմա Չոբանյան
