26.04.2026 | 14:53
«Հայաստանը՝ աշխարհի ամենաանվտանգ երկրների շարքում. մեծամասշտաբ միջոցառումներն անցել են առանց միջադեպերի». ՆԳՆ
20 տարի անց ԱՄՆ ԶՈՒ-ն հեռացել է Աֆղանստանից․ ի՞նչ է սպասվում երկրին․ DW-ի անդրադարձը
Քաղաքականություն
02.07.2021 | 13:51
20 տարի անց ԱՄՆ ԶՈՒ-ն հավաքել է ճամպրուկներն ու հեռացել Աֆղանստանի Բագրամի օդանավակայանից, այս մասին DW-ին հայտնել են պաշտոնական աղբյուրները։
2001 թվականի սեպտեմբերի 11-ի ահաբեկչությունից հետո այս վայրը եղել է Աֆղանստանում ԱՄՆ-ի մղած պատերազմի էպիկենտրոնը։ Ըստ պարբերականի՝ ԱՄՆ ուժային կառույցից անանուն աղբյուրը հայտնել է, որ «բոլոր կոալիցիոն ուժերը հեռացել են Բագրամից»։
Այս շաբաթ 19 պետություններ հայտարարել են իրենց զորքերի դուրսբերման մասին։ Ընդհանուր առմամբ, 4800 զինվորական է հեռացել Աֆղանստանից։
Չորեքշաբթի Գերմանիան և Իտալիան հայտարարել են Աֆղանստանում իրենց առաքելության ավարտի, իսկ Լեհաստանը՝ իր զորքերն ամբողջությամբ տուն վերադարձնելու մասին:
Սակայն DW-ն գրում է, որ անհասկանալի է՝ արդյո՞ք ԱՄՆ ռազմաբազան փոխանցվել է Աֆղանստանի ազգային անվտանգության և պաշտպանության ուժերին։ Ըստ AP-ի՝ ռազմաբազան հանձնվել է, իսկ ըստ AFP-ի՝ այս հարցը դեռևս անորոշ է: Reuters-ին էլ աֆղանցի պաշտոնյաներից մեկն ասել է, որ ռազմաբազան պաշտոնապես կհանձնվի շաբաթ օրը:
Ամերիկացի գեներալ Օսթին Միլլերը շաբաթվա սկզբին հանդես է եկել վերջին մամլո ասուլիսով, որի ժամանակ մռայլ է պատկերել երկրում անվտանգային իրավիճակը։ Մատնանշելով բազմաթիվ գրավված շրջանները՝ գեներալ Միլլերն ասել է, որ «քաղաքացիական պատերազմն անխուսափելի է, եթե իրադարձությունները շարունակեն այսպես զարգանալ, և սա պետք է անհանգստացնի աշխարհին»։
Չնայած զորքերի դուրսբերմանը՝ Միլլերը նշել է, որ ապագայում ԱՄՆ-ը կարող է ավիահարվածներ հասցնել թալիբներին, Ալ-Քաիդային կամ այլ զինյալ խմբավորումների, ինչպիսիք են «Իսլամական պետությունը», որոնք առկա են այս երկրում, բայց դա կանի երկրից դուրս գտնվող ռազմաբազաներից:
Տաթև Ֆռանգյան
