17.12.2025 | 18:50
Սուրեն Պապիկյանի հրամանով տարածքային պաշտպանության զորքերի հրամանատարությանը հանձնվել է մարտական դրոշ
ԱՄՆ 52 միլիոն դոլար կհատկացնի Հայաստանին և Արցախին
Քաղաքականություն
02.07.2021 | 12:03
ԱՄՆ 52 միլիոն դոլար կհատկացնի Հայաստանին և Արցախին։ Այս մասին Facebook սոցցանցի իր էջում հայտնել է կոնգրեսական Ադամ Շիֆը։
Նա նաև հայտարարել է, որ ԱՄՆ պետք է ձեռնարկի հնարավոր բոլոր դիվանագիտական գործողությունները՝ վերջ տալու ադրբեջանական ագրեսիային և ապահովելու բոլոր հայ կալանավորվածների և ռազմագերիների անհապաղ ազատ արձակումը։
«Ավերիչ հակամարտությամբ և անհավատալի տառապանքներով նշանավորված տարուց հետո, Ներկայացուցիչների պալատի հայկական խմբի մյուս համանախագահների հետ միասին մենք կարողացանք վերջերս ներկայացված Ներկայացուցիչների պալատի արտաքին գործերի ծախսերի օրինագծով ավելի քան 52 միլիոն դոլարի ֆինանսավորում ապահովել Հայաստանի ու Արցախի համար։ Այս կայուն ներդրումը կաջակցի Հայաստանում ժողովրդավարական, տնտեսական և էներգետիկ բարեփոխումներին, իսկ Արցախին հրատապ մարդասիրական օգնություն կտրամադրվի:
Բայց մեր աշխատանքը հեռու է ավարտված լինելուց: Մենք պետք է շարունակենք դրդել Բայդենի վարչակազմին ձեռնարկել հնարավոր բոլոր դիվանագիտական գործողությունները՝ վերջ տալու ադրբեջանական ագրեսիային և ապահովելու բոլոր հայ կալանավորվածների և ռազմագերիների անհապաղ ազատ արձակումը, որոնցից ոմանք խոշտանգվել են՝ խախտելով մարդու իրավունքների միջազգային կոնվենցիաները: Մենք պետք է նաև շարունակենք դրդել նախագահ Բայդենին՝ զերծ մնալ ԱՄՆ-ի կողմից Ալիևի ռեժիմին օգնություն տրամադրելուց, որը շարունակում է կատարել մարդու իրավունքների լուրջ խախտումներ և սպառնում է Հայաստանի անկախությանը:
Ես միշտ կանգնելու եմ Հայաստանի և Արցախի ժողովրդի կողքին: Միշտ»,- գրել է ամերիկացի կոնգրեսականը։
Տաթև Ֆռանգյան
