Թուրքիայում դաժան պատիժներ են սահմանվել տասնյակ նախկին դատավորների և դատախազների նկատմամբ

Թուրքիայում դաժան պատիժներ են սահմանվել մի խումբ անձանց նկատմամբ իսլամական քարոզիչ Ֆեթուլլահ Գյուլենի FETÖ ցանցին անդամակցելու համար, որը, ըստ Անկարայի, կանգնած է եղել երկրում 2016-ի հուլիսին պետական հեղաշրջման փորձի հետևում, գրում է EurAsia Daily-ն:

Հազարավոր մարդկանց ապօրինի գաղտնալսումներ թույլ տալու համար 55 նախկին դատավորներ և դատախազներ կանգնել են դատարանի առջև: Անցյալ չորեքշաբթի ամբաստանյալներից 20-ը դատապարտվել է 11 տարվա ազատազրկման՝ «Սելամ Թեհվիդ» անունով հայտնի «զինված ահաբեկչական խմբավորման» մեջ ներգրավվածություն ունենալու համար։

Դատական իշխանությունները կարգադրել են առանձին քրեական գործ հարուցել փախուստի դիմած 23 ամբաստանյալների, այդ թվում՝ Սիհան Կանզիզի, Ջելալ Քարայի և Մուամմեր Աքքաշի նմակտմամբ: Նրանք մեղադրվում են «քաղաքական և ռազմական լրտեսության», պետական գաղտնիքները հրապարակելու մեջ:

Դատապարտվածների թվում են նախկին դատավոր Սուլեյման Քարաքոլը և նախկին դատախազ Սադրեթին Սարիքայան: Նրանցից յուրաքանչյուրը երկար բանտարկություն է ստացել՝ 13 տարի ժամկետով:

Թուրքիայի իշխանությունները FETÖ-ին մեղադրում են սահմանադրական կարգը տապալելու երկարատև արշավի մեջ՝ ներթափանցելով թուրքական ինստիտուտներ, հատկապես՝ երկրի զինված ուժեր, ոստիկանություն և դատական համակարգ:

Հիշեցնենք, որ 2016-ի հուլիսի 15-ի լույս 16-ի գիշերը Թուրքիայում ձախողված հեղաշրջման զոհ դարձավ ավելի քան 250 մարդ, ավելի քան 2․000-ը՝ վիրավորվեց: Թուրքիայի իշխանություններն արտակարգ դրություն մտցրեցին երկրում, որը հանվեց 2 տարի անց՝ 2018-ի հուլիսին: Այդ ժամանակից ի վեր տասնյակ հազարավոր մարդիկ ձերբակալվել են: Նրանց թվում են զինվորականներ, ոստիկանության աշխատակիցներ, դատախազության և դատական համակարգի աշխատակիցներ, լրագրողներ, իրավապաշտպաններ և այլք:

Տաթև Ֆռանգյան