11.10.2026 | 18:49
Թրամփը կրկին հայտարարել է, որ Ռուսաստանն ու Ուկրաինան համաձայնության են եկել էներգետիկ հրադադարի շուրջ
Վյուրցբուրգում դանակով անցորդների վրա հարձակումն իսլամիստական դրդապատճառ է ունեցել
Քաղաքականություն
29.06.2021 | 18:15
Բավարական Վյուրցբուրգ քաղաքի կենտրոնում դանակով հարձակումը, որը հունիսի 25-ին իրականացրել էր 24-ամյա սոմալացին, ըստ ամենայնի, իսլամիստական դրդապատճառ է ունեցել։ Այս մասին հունիսի 29-ին հայտնել են Մյունխենի դատախազությունից և Բավարիայի ոստիկանությունից, գրում է DW-ի ռուսական ծառայությունը։
«Այդ հանցագործությունների իսլամիստական դրդապատճառը հավանական է»,- նշել են հետաքննիչները։
Սրա հետ մեկտեղ, մեղադրյալի բնակարանի խուզարկության ժամանակ ոչ մի քարոզչական նյութ չի հայտնաբերվել, հայտնել են ոստիկանությունից։ Միջադեպի հետաքննությանը ներգրավված է ոստիկանության 130 աշխատակից։
Ենթադրության համար, որ չարագործը ղեկավարվել է իսլամիստական դրդապատճառներով, հիմք է հանդիսանում այն փաստը, որ հարձակման ժամանակ տղամարդը, ականատեսների վկայություններով, գոռացել է «Ալլահ աքբար» (Աստված մեծ է)։ Բացի այդ, ձերբակալությունից հետո գտնվելով Վյուրցբուրգի քաղաքային կլինիկայում՝ սոմալացին իր արարքն անվանել է «ջիհադ» կամ «սուրբ պատերազմ», հայտնում է epd գործակալությունը:
Հիշեցնենք՝ հունիսի 25-ին Սոմալիի 24-ամյա քաղաքացին Վյուրցբուրգի կենտրոնում խանութներից մեկից գողացված դանակով հարձակվել է անցորդների վրա։ Այս հանցագործության զոհ է դարձել 3 կին։ 6 մարդ ծանր մարմնական վնասվածքներ է ստացել, ևս մեկ անցորդ՝ թեթև մարմնական վնասվածք։
Տաթև Ֆռանգյան
