Ալիևը հայտարարել է, թե ԼՂ հակամարտությունը կարգավորված է և այդ հարցով բանակցությունների կարիք չկա

Ադրբեջանի նախագահ Իլհամ Ալիևը հերթական անգամ հնչեցրել է ադրբեջանական թեզը այն մասին, որ Լեռնային Ղարաբաղի հակամարտությունը կարգավորված է և այդ հարցով որևէ բանակցության անհրաժեշտություն չկա։ Ադրբեջանական լրատվամիջոցների հաղորդմամբ՝ Ալիևն այս մասին հայտարարել է Ռումինիայի, Ավստրիայի և Լիտվայի ԱԳ նախարարների հետ հանդիպմանը։

«Ներկայում մենք գտնվում ենք հետկոնֆլիկտային զարգացման փուլում։ Լեռնային Ղարաբաղի հակամարտությունը լուծված է և անհրաժեշտություն չկա բանակցություններ վարել այդ հարցով»,- ասել է Ալիևը։

Նա նշել է, որ 2020թ․ նոյեմբերի 10-ի եռակողմ հայտարարությունը ո՛չ միայն հրադադարի մասին համաձայնագիր է։

«Նա, ով կարդա այդ փաստաթուղթը, կտեսնի, որ այն ընդգրկում է շատ այլ հարցեր։ Մենք պետք է մտածենք հետկոնֆլիկտային իրավիճակի մասին։ Մենք շրջել ենք այդ էջն ու պատրաստ ենք առաջ գնալ՝ ներդրում ունենալով տարածաշրջանային կայունության մեջ»,- ասել է Ալիևը։

Բացի այդ, Ադրբեջանի նախագահը կրկին խոսել է Հայաստանի հետ խաղաղության պայմանագրի կնքման մասին։

«Հայաստանի կառավարությունն անտեսում է մեր ցանկացած հայտարարություն՝ Երևանի հետ խաղաղ համաձայնագրի կնքման մասին։ Բացառված չէ, որ նախընտրական իրավիճակը չի նպաստել այդպիսի հայտարարություններին։ Բայց հիմա, Հայաստանում ընտրություններից հետո, հուսով ենք ստանալ դրական պատասխան»,- ասել է Ալիևը՝ հավելելով․ «Եթե մենք չունենք խաղաղության համաձայնագիր Հայաստանի հետ, նշանակում է՝ չկա նաև խաղաղություն։ Չկա խաղաղություն ոչ միայն երկու երկրների միջև, այլև ամբողջ Հարավային Կովկասում։ Մեզ պետք է խաղաղություն և կայուն զարգացում, կանխատեսելիություն, պատերազմի զրոյական վտանգ։ Մեզ պատերազմ պետք չէ, առաջ էլ պետք չէր»։

Ի դեպ, պատերազմ սկսելու մեջ, որն Ադրբեջանի ղեկավարությունը մշակել ու իրականացրել է թուրքական ռազմաքաղաքական ղեկավարության հետ, Ալիևը, ինչպես միշտ, մեղադրել է հայկական կողմին՝ նշելով, որ կատարվածի պատասխանատուն Հայաստանն է։

«Ղարաբաղյան երկրորդ պատերազմը անխուսափելի էր և դա պարզ էր բոլորին»,- ասել է Ալիևը։

Էմմա Չոբանյան