30.04.2026 | 15:10
ՀՀ-ն հետընթաց է ապրել մամուլի ազատության ինդեքսում // Փաշինյանը՝ գերիների վերադարձի մասին․ ԼՈՒՐԵՐ
«Կոռուպցիայի կանխարգելման հանձնաժողովի մասին» օրենքի նախագիծն առաջին ընթերցմամբ միաձայն ընդունվեց
Քաղաքականություն
08.06.2017 | 11:33
Խորհրդարանն արտահերթ նիստով քվեարկության ներկայացրեց երեկ քննարկված երկու հարց։ «Կոռուպցիայի կանխարգելման հանձնաժողովի մասին» և կից ներկայացված օրենքների փաթեթն առաջին ընթերցմամբ քվեարկության ներկայացնելուց առաջ վարման կարգով խոսեցին մի քանի պատգամավորներ։
Նախագծի համահեղինակ, ԱԺ փոխնախագահ Արփինե Հովհաննիսյանը տեղեկացրեց, որ և՛ ընդդիմության, և՛ ՀՅԴ-ի կողմից ներկայացվել է առաջարկություն, որ մրցութային խորհրդում առաջարկություն անելու իրավունք ունենան ընդդիմադիր խմբակցությունները։
«Առաջարկն ընդունելի է համարվել, արդեն իսկ կա համապատասխան ձևակերպումը»,- ասաց նա։
«Ելք» խմբակցության ղեկավար Նիկոլ Փաշինյանն էլ ասաց, որ նախագիծն «իրենց պատկերացրածը չէ, բայց նեգատիվ չեն տրամադրված»։ «Սա մեկ քայլ առաջ է մեր պատկերացումներին համապատասխանող հակակոռուպցիոն հանձնաժողով ստեղծելու ուղղությամբ, ուստ կողմ կքվեարկենք նախագծին»,- նկատեց Փաշինյանը։
ԱԺ փոխնախագահ Միքայել Մելքումյանն էլ հավելեց, որ բանակցել են Արփինե Հովհաննիսյանի հետ՝ գալով ընդհանուր հայտարարի, ուստի կողմ են քվեարկելու։
Նախագիծն ի վերջո դրվեց քվեարկության և ընդունվեց 87 կողմ, 0 դեմ և 0 ձեռնպահ ձայների հարաբերակցությամբ։
ԱԺ նախագահ Արա Բաբլոյանը ներկայացրեց խորհրդարանին գործուղումների մեջ գտնվող պատգամավորների համապատասխան գրությունները։
Առաջին ընթերցմամբ քվեարկության ներկայացվեց նաև «Հանրային ծառայությունները կարգավորող մարմնի մասին» ՀՀ օրենքում փոփոխություններ և լրացումներ կատարելու մասին օրենքի նախագիծը, այն նույնպես ընդունվեց միաձայն։
Սեդա Ղուկասյան
