08.10.2026 | 16:28
Ստամբուլում շենքի փլուզման հետևանքով կան զոհեր․փրկարարական աշխատանքները շարունակվում են
2008-ին էլ, 2013-ին էլ հավաքներին մասնակցել եմ․ այս աստիճան ատելության մթնոլորտ չեմ հիշում․ Գևորգ Թամամյան․ ՏԵՍԱՆՅՈՒԹ
Քաղաքականություն
17.06.2021 | 19:02
Նախընտրական քարոզարշավի, ստեղծված մթնոլորտի և «5165 շարժում» կուսակցության մասին Factor TV-ի տաղավարում զրուցել ենք կուսակցության ցուցակով պատգամավորության թեկնածու Գևորգ Թամամյանի հետ
–Պարո՛ն Թամամյան, 20-ից ավելի ուժեր են մասնակցում ընտրություններին, ինչո՞ւ համեմատաբար փոքր ընտրազանգված ունեցող ուժերը չեն միավորվում, որպեսզի շանսերը ավելի մեծ լինեն։
-Ճիշտ եք ասում, այս դիսկուրսը կա։ «5165 շարժումն» արդեն միավորման արդյունք է՝ մոտ տասը նախաձեռնություններ, կուսակցություն, ուժեր միավորվեցին, և այս շարժումը ստեղծվեց։ Մենք փորձել ենք է՛լ ավելի ընդլայնվել և միավորման հարթակը մեծացնել։ Այսքանը ստացվեց, որովհետև շատ կարևոր էր, որ գաղափարական նմանություն լիներ, գոնե համընկնումներ։
–Նախընտրական շրջանում կա բևեռացում, և քաղաքական ուժերը, գործիչները տարբեր որակումներ են տալիս միմյանց։ Ինչպե՞ս եք ուզում հասնել այս ուժերին, այս բևեռներին համերաշխության սեղանի շոււրջ նստեցնելուն։
-Շատ դժվար է, իհարկե, երբ այսօր նայում ենք։ Այս աստիճանի բևեռացում ես չեմ հիշում։ Այս աստիճանի ատելության մթնոլորտ ես Հայաստանում համենայն դեպս չեմ հիշում։ Գրեթե բոլոր հանրահավաքներին եղել եմ։ 2008-ին էլ, 2013-ին էլ մասնակցել եմ, բայց այս աստիճանի ատելության մթնոլորտ ես չեմ հիշում, որ գեներացվեր դաշտում և իջեցվեր անձնական մակարդակի։
–Սա հատուկ գեներացվա՞ծ է։
-Գեներացվել է ուժերի կողմից։ Եվ առաջին հերթին սա իշխանությունից է գալիս։ Հռետորաբանությունը որ նայեք՝ մուրճ ու մանգաղի, այսպիսի բան ես չեմ հիշում։ Դրան էլ հակառակ պատասխանն է ստացվում։
–Ինչպե՞ս խուսափել բախումներից, որոնց մասին արդեն ամեն օր ասվում է։
-Տարբեր ուժեր կոչ են անում, ներքին հաշտության և բախումների չգնալու օրակարգն են առաջ տանում։ Դա պիտի արվի՝ հայը հայի արյուն չպետք է թափի։ Սա մեր երկրի կործանման հիմքը կդնի։ Ամսի 21-ից 24-ը Հանրապետության հրապարակում արդեն հանրահավաքներ են նախանշված, իշխանությունները հանրահավաք են պլանավորել։ Ինչի՞ համար։ Անունը դնում են՝ հաղթանակի․․․ 4 օր հաղթանակի հաղթանակ են անելո՞ւ։ Բոլորս էլ հասկանում ենք, ոչ ոք երեխա չէ, ոչ ոք հիմար չէ։ Հասկանում ենք՝ ինչ է լինում, ուր է գնում։
–Ո՞ւր է գնում։
-Բախումների, իմ կարծիքով։ Աստված տա՝ ես սխալվեմ։ Բայց այսօր ուժերի կողմից տարվում է այդ օրակարգը։ Այդ ատելության մթնոլորտը, որ կա, աստված չանի՝ դառնա քաղաքացիական բախումների առիթ։ Իմ կարծիքով՝ այստեղ ամենակարևոր դերակատարումը պետք է ունենան իրավապահ մարմինները։ Եվ իրենք իրենց պարտականությունները պիտի կատարեն։
Հարցազրույցն ամբողջությամբ՝ տեսանյութում։
Գարիկ Հարությունյան
