18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
G7-ը խոստացել է 1 մլրդ դեղաչափ կորոնավիրուսի դեմ պատվաստանյութ տալ աշխարհի ամենաաղքատ երկրներին
Քաղաքականություն
11.06.2021 | 12:46
Մեծ Բրիտանիայի Քորնուոլ քաղաքում մեկնարկել է կորոնավիրուսային համաճարակի սկզբից ի վեր G7-ի առաջին դեմ առ դեմ գագաթնաժողովը: Ակնկալվում է, որ այն կենտրոնանալու է Covid-19-ի դեմ պայքարի վրա։ Արդյունաբերական խոշորագույն երկրների ղեկավարները խոստանում են 1 միլիարդ դեղաչափ կորոնավիրուսի դեմ պատվաստանյութ տրամադրել աշխարհի ամենաաղքատ երկրներին, գրում է BBC-ի ռուսական ծառայությունը:
Բրիտանիա ժամանած ԱՄՆ նախագահ Ջո Բայդենը հինգշաբթի հայտնել է, որ ցածր և միջին եկամուտ ունեցող 92 երկրներ, ինչպես նաև Աֆրիկյան միությունը, Վաշինգտոնից կստանան 500 միլիոն դեղաչափ Pfizer դեղամիջոց: Մեծ Բրիտանիայի վարչապետ Բորիս Ջոնսոնն իր հերթին խոստացել է, որ հաջորդ տարվա վերջին Լոնդոնն ավելի քան 100 միլիոն պատվաստանյութի չափաբաժին կուղարկի կարիքավոր երկրներին:
ԱՄՆ-ի ու Մեծ Բրիտանիայի առաջնորդները նաև առաջին դեմ առ դեմ հանդիպումն են անցկացրել այն բանից հետո, ինչ Ջոնսոնը Սպիտակ տանը Բայդենի հայտնվելն անվանել է «մի կում թարմ օդ»։ ԱՄՆ նախագահը և Բրիտանիայի վարչապետը ստորագրել են «ատլանտյան խարտիա», որն ամրագրում է համաշխարհային խնդիրները համատեղ լուծելու՝ երկու երկրների ձգտումը։
Ըստ Բայդենի՝ խոսքը «դարաշրջանի հիմնական մարտահրավերների՝ կիբերանվտանգության, նոր տեխնոլոգիաների, համաշխարհային առողջապահության ու կլիմայի փոփոխության մասին» է։
Տաթև Ֆռանգյան
