«Իմ քայլը» լքածները Նիկոլ Փաշինյանին ԱԺ ամբիոնին մոտեցնելու տարբերակ են առաջարկում

Ազգային ժողովի «Իմ քայլը» խմբակցությունը լքած պատգամավորներ Սոֆյա Հովսեփյանի, Թագուհի Թովմասյանի և Գոռ Գևորգյանի կողմից օրենսդրական նախաձեռնություն է մշակվել, որով առաջարկվում է «Ազգային ժողովի կանոնակարգ» սահմանադրական օրենքում փոփոխություններ կատարել:

Իշխող խմբակցության նախկին պատգամավորները ցանկանում են հասնել նրան, որ ԱԺ հերթական նիստի ընթացքում Կառավարության հետ հարցուպատասխանի ընթացքում գործադիրի բոլոր անդամները, այդ թվում՝ վարչապետը, մոտենան ԱԺ ամբիոնին և պատասխանեն պատգամավորների բանավոր հարցերին:

«Գործնականում Կառավարության անդամները, գտնվելով ԱԺ նիստերի դահլիճում, երբեմն բանավոր չեն պատասխանում պատգամավորների բանավոր հարցերին՝ փոխարենը նիստը վարողի միջոցով առաջարկելով հարցը ներկայացնել գրավոր: Ուստի, ներկայացված նախագծի ընդունումը նպատակ ունի սահմանել պարտադիր պահանջ Կառավարության անդամների համար՝ ԱԺ-Կառավարություն հարցուպատասխանի ժամանակ պարտադիր մոտենալ ԱԺ ամբիոնին և բանավոր պատասխանել պատգամավորների հարցերին կամ բանավոր ներկայացնել հիմնավորում՝ պատգամավորների հարցերին բանավոր չպատասխանելու պատճառների մասին»,- ասված է պատգամավորների ներկայացրած նախագծում:

Հիշեցնենք՝ Նիկոլ Փաշինյանը բազմիցս հրաժարվել է պատասխանել այս պատգամավորների հարցերին: Սա էլ եղել է պատճառ, որ պատգամավորները նման նախաձեռնությամբ հանդես գան: Այս նախագիծն ընդգրկվել է Կառավարության նիստի վաղվա օրակարգում՝ չզեկուցվող հարցերի փաթեթում:

Նարեկ Կիրակոսյան