Վարչապետի պաշտոնակատարը՝ «խնայողական ռեժիմով»․ ի՞նչ է նշված Փաշինյանի հայտարարագրում

Factor.am-ը շարունակում է արտահերթ խորհրդարանական ընտրություններին մասնակցող կուսակցությունների և կուսակցությունների դաշինքների ընտրական ցուցակի առաջին երեք տեղերը զբաղեցնող անձանց գույքի և եկամուտների մասին հայտարարագրերը ներկայացնող շարքը։

12 մլն 433 հազար 990 դրամ՝ մեկ տարում․ հենց այսքան է Նիկոլ Փաշինյանը նշել որպես վարչապետի պաշտոնում աշխատանքի համար վարձատրություն։ Կոռուպցիայի կանխարգելման հանձնաժողով ներկայացված հայտարարագրում վարչապետի պաշտոնակատարը ներկայացրել է նաև տարեսկզբի դրությամբ առկա կանխիկ դրամական միջոցների ծավալը՝ 790 000 դրամ և 1800 դոլար։

Ուշագրավ է նաև ավանդների մասին տվյալը։ Եթե 2020 թվականի սկզբին այն կազմել է 4,5 մլն դրամ, ապա տարեվերջին դարձել է 2,5 մլն դրամ։ Նվազում է արձանագրվել նաև բանկային հաշիվների դեպքում։ Այսպես, Նիկոլ Փաշինյանի բանկային հաշիվները 2020-ի սկզբին եղել են շուրջ 3,33 մլն դրամ, տարեվերջին՝ մոտ 1 մլն դրամ։ Ոչ անշարժ գույք, ոչ փոխադրամիջոցներ․ նման տվյալներ վարչապետի պաշտոնակատարը չի ներկայացրել։ Ներկայացված չեն նաև տեղեկություններ արժեթղթերի և ներդրումների, հանձնված և վերադարձված փոխառությունների մասին։

Նիկոլ Փաշինյանի կինը՝ Աննա Հակոբյանը, տարեսկզբին հայտարարագրել է 904․863 դրամ, որը տարեվերջին կազմել է 145 435 դրամ։ Հակոբյանը հայտարարագրել է 1000 դոլար՝ որպես առկա կանխիկ դրամական միջոց։ «Մեր Տպարանը » ՍՊԸ-ից Աննա Հակոբյանը ստացել է շուրջ 2 մլն դրամ որպես աշխատանքի վարձատրություն։

Աննա Հակոբյանը մեկ այլ՝ «Դարեսկիզբ» ՍՊԸ-ից, որի կազմում են «Հայկական ժամանակ» օրաթերթն ու Armtimes.com-ը, նույն կարգով ստացել է շուրջ 4 մլն դրամ, իսկ «Յունիբանկ»-ից վերցրել 499 հազար դրամի վարկ։ Ինչ վերաբերում է տրանսպորտային միջոցներին, ապա Աննա Հակոբյանը հայտարարագրել է 2009 և 2010 թվականներին ձեռքբերված երեք ավտոմեքենա։

Փաշինյանի որդին՝ Աշոտ Փաշինյանը, միայն աշխատավարձ է հայտարարագրել։ «Մինիսո ԷՅ ԷՄ» ՍՊԸ-ում ապրանքագետի հաստիքում աշխատանքի համար նա ստացել է 408 320 դրամ։

Նիկոլ Փաշինյանի դուստրը՝ Մարիամ Փաշինյանը, 2020 թվականի ընթացքում «Դիջիթեյն» ընկերությունում աշխատանքի համար վարձատրություն չի հայտարարագրել։ Բայց «Դարեսկիզբ ՍՊԸ»-ից վարձատրվել է 5 մլն 134 հազար 548 դրամով։ Մարիամ Փաշինյանը 2020-ի սկզբին հայտարարագրել է 324 267 դրամ՝ առկա բանկային հաշվին։ Արդեն տարեվերջին միջոցները կազմել են 438 482 դրամ։