Քովիդի դեմ պայքարում ո՞ր հաջողությունների համար են առողջապահության նախարարն ու տեղակալները նախագահի կողմից պետական բարձր պարգևների արժանացել

Հանրապետության նախագահ Արմեն Սարգսյանի հրամանագրերով՝ պատերազմի հետևանքով տուժած զինծառայողներին և խաղաղ բնակչությանն անհրաժեշտ բժշկական և մարդասիրական օգնություն ցուցաբերելու գործում ներդրած ավանդի և դրսևորած անձնվիրության, ինչպես նաև կորոնավիրուսային համավարակի կանխարգելման, վերահսկման և բուժման աշխատանքների կազմակերպման և իրականացման գործում ներդրած ավանդի համար, առողջապահության համակարգի մի խումբ աշխատակիցներ պարգևատրվել են մեդալներով:

Նախագահական նստավայրում այսօր տեղի է ունեցել պարգևատրման հանդիսավոր արարողությունը: Այս մասին հայտնում են նախագահի աշխատակազմից:

Ուսումնասիրելով հրամանագրերը՝ Factor.am-ը պարզեց, որ պետական բարձր պարգևների են արժանացել նաև առողջապահության նախարարն ու նրա տեղակալները: Առողջապահության նախարար Անահիտ Ավանեսյանը, նախարարի տեղակալ Արտյոմ Սմբատյանն արժանացել են «Հայրենիքին մատուցած ծառայությունների համար» 1-ին աստիճանի մեդալով, նախարարի մյուս տեղակալները՝ Գևորգ Սիմոնյանը և Լենա Նանուշյանը, պարգևատրվել են Մխիթար Հերացու մեդալով:

Ուշագրավ է, որ այս մասին առողջապահության նախարարությունը որևէ հրապարակում չի արել, նախագահականի կայքում ևս լուսանկարներ չկան նախարարի և նրա տեղակալների պարգևատրման արարողությունից: Տարակուսելի է, որ առողջապահության ոլորտի թիվ մեկ պատասխանատուները պարգևատրվում են այն հանգամանքում, երբ Հայաստանում կորոնավիրուսի դեմ պայքարն այնքան էլ արդյունավետ չի իրականացվում, քանի որ ամեն օր գրանցվում են մահացության դեպքեր: Մինչ այս պահը կորոնավիրուսից մահացել է 4․394 քաղաքացի, իսկ 1․075 քաղաքացի էլ մահացել է այլ հիվանդություններից, թեև վարակված է եղել վիրուսով: Թեև այս դեպքերի մեծ մասը գրանցվել է Արսեն Թորոսյանի պաշտոնավարման օրոք, բայց և Անահիտ Ավանեսյանի պաշտոնավարումն էլ աչքի չի ընկնում ակնառու դրական տեղաշարժով:

Նարեկ Կիրակոսյան