Եվրախորհրդի խորհրդարանական վեհաժողովի (ԵԽԽՎ) զեկուցողը մայիսի 19-22-ը կայցելի Հայաստան ՝ Միգրացիայի, փախստականների և բնակչության հանձնաժողովի հանձնարարությամբ ՝ ուսումնասիրելու Հայաստանի և Ադրբեջանի միջև հակամարտության հումանիտար հետևանքները: Այս մասին այսօր հայտնել են կազմակերպությունից:
«Մայիսի 19-22-ը Միգրացիայի, փախստականների և բնակչության հարցերով հանձնաժողովի անունից Փոլ Գավանը կայցելի Հայաստան։ Այցի նպատակն է տեղեկատվություն հավաքել «Հայաստանի և Ադրբեջանի միջև հակամարտության հումանիտար հետևանքները» թեմայով զեկույցի համար: Նա հանդիպումներ կունենա հայ խորհրդարանականների, այդ թվում նաև ԱԺ նախագահի, հակամարտության հետևանքների հետ առնչություն ունեցող տարբեր նախարարությունների ներկայացուցիչների հետ։ Նա նաև կզրուցի տեղահանվածների, ռազմագերիների ու անհետ կորածների ընտանիքների անդամների հետ, կհանդիպի նաև հոգևոր ղեկավարների ու ՀՀ-ում մարդու իրավունքների պաշտպանի ու քաղաքացիական հասարակության այլ ներկայացուցիչների հետ։
Այցը հնարավորություն կընձեռի՝ հասկանալու Հայաստանում տվյալ խնդրով զբաղվող միջազգային կազմակերպությունների դերն ու նշանակությունը, այդ թվում և Կարմիր խաչի միջազգային կոմիտեի ու ՄԱԿ-ի գրասենյակների, մասնավորապես ՄԱԿ-ի Փախստականների հարցով գերագույն հանձնակատարի դերակատարումը»,- ասված է զեկույցում:
Տեղեկացվում է, որ ավելի ուշ՝ ամռանը Գավանը կայցելի նաև Ադրբեջան:
Ակնկալվում է, որ նրա զեկույցը պատրաստ կլինի աշնանը:
Տաթև Ֆռանգյան
