Հայաստանը պաշտոնապես դիմել է ՀԱՊԿ-ին․ Տիգրան Ավինյան

ՀՀ փոխվարչապետի պաշտոնակատար Տիգրան Ավինյանը Սյունիքում լրագրողների հետ զրույցում հաստատել է՝ Հայաստանը պաշտոնապես դիմել է ՀԱՊԿ-ին, միաժամանակ, նշելով, որ Պաշտպանության և Արտաքին գործերի նախարարությունները պաշտոնապես տեղյակ կպահեն այդ մասին։

Հստակեցնող հարցին, թե որ կետով է Հայաստանը դիմել, Ավինյանը մանրամասնեց․ «Ճգնաժամի կառավարման կետով ենք դիմել ՀԱՊԿ-ին՝ հետագա հնարավոր խորացումից խուսափելու համար։ Շատ կարևոր է յուրաքանչյուր իրավիճակին ադեկվատ ռեակցիա տալ ու մի փոքր չչափազանցնել իրողությունը։ Մինչ այս պահը մենք մեր գործողություններում եղել ենք համարժեք»։

Ինչ վերաբերում է ադրբեջանցիների հետ բանակցություններին, պաշտոնյան նշել է, որ բանակցություններն ընթանում են, այս փուլում վերջնական արդյունքներ չունենք։

«Ես համոզված եմ, որ այս կամ այն կերպ մենք հանգուցալուծման հասնելու ենք, որովհետև շատ հստակ է, որ ադրբեջանական զինված ուժերն անցել են Հայաստանի Հանրապետության սուվերեն տարածքը»,- ասել է Ավինյանը՝ շեշտելով, որ ցանկանում են խաղաղ կերպով հանգուցալուծել իրավիճակն ու պատրաստ են հանգիստ ու հանդարտ ռեժիմով քննարկումներ իրականացնելու, բայց պետք է նաև պատրաստ լինել մեր ինքնիշխան տարածքի պաշտպանությանը։

«Պետք է պատրաստ լինել հնարավոր վատ զարգացումներին, նաև պատրաստ լինել մեր ինքնիշխան տարածքի պաշտպանությանը։ Վատ սցենարի դեպքում ակնկալում ենք մեր դաշնակիցների աջակցությունը, բայց ես հուսով եմ, որ մենք որևէ վատ սցենարներ չենք ունենա այստեղ ու բանակցությունների միջոցով բոլոր հարցերը կլուծվեն»,- նշեց Ավինյանը։

Ադրբեջանական կողմի ցույց տված քարտեզների մասին հարցին ի պատասխան՝ Տիգրան Ավինյանն արձագանքել է, որ այդ քարտեզներն անհայտ ծագման են և որևէ աղերս չունեն իրականության հետ։

«Փաստացի, կարելի է ասել՝ այդ քարտեզների հիմքով են նրանց սահմանապահ զորքերն առաջ եկել, բայց, այնուամենայնիվ, ադրբեջանական կողմը հաստատում է խաղաղ կարգավորմանն ուղղված իր ջանքերը, ըստ իրենց՝ իրենք որևէ քայլ չեն ձեռնարկում՝ հետագա լարումն ավելի խորացնելու համար, բայց ես կրկնում եմ՝ մենք պատրաստ ենք բոլոր հնարավոր սցենարներին, և երեկվա ԱԽ նիստն ու մեր դիմումը ՀԱՊԿ-ին նմանատիպ սցենարների հնարավոր զարգացման կանխարգելման մեխանիզմ է»,- ասել է նա։