14.09.2026 | 21:13
Oգոստոսի կլիմայական պայմանները Հայաստանում
Ալիևը Շուշին «Ադրբեջանի մշակութային մայրաքաղաք» է հռչակել
Քաղաքականություն
07.05.2021 | 13:38
Ադրբեջանի նախագահ Իլհամ Ալիևը մայիսի 7-ին հրամանագիր է ստորագրել, որով նոյեմբերի 9-ի եռակողմ հայտարարությունից հետո Ադրբեջանի վերահսկողությանն անցած հայկական Շուշի քաղաքը հայտարարվում է «Ադրբեջանի մշակութային մայրաքաղաք», հայտնում են ադրբեջանական լրատվամիջոցները:
Հրամանագրի համաձայն՝ 1977 թվականին «ազգային առաջնորդ Հեյդար Ալիևի նախաձեռնությամբ որոշում էր կայացվել «Շուշի քաղաքի պատմական մասը պատմական ու ճարտարապետական արգելոց հռչակելու մասին»: Նշվում է, թե այս որոշման արդյունքում կարևոր քայլեր են ձեռնարկվել Շուշիի հուշարձանների պահպանման ուղղությամբ՝ հավերժացնելով մշակույթի և արվեստի ականավոր գործիչների հիշատակը»:
Հիշեցնենք, որ պատմամշակութային արժեքներ «գնահատող» Իլհամ Ալիևը Արցախի օկուպացված տարածքներում ոչնչացնում է հայկական եկեղեցիներն ու պաշմամշակութային արժեքները։ Օրերս տեղեկություններ հայտնվեցին, որ Ադրբեջանը հանել է Շուշիի Սուրբ Ամենափրկիչ Ղազանչեցոց եկեղեցու գմբեթը։
ՀՀ ԱԳՆ-ն ահազանգել էր՝ Ադրբեջանը փոխում է Շուշիի Սուրբ Ամենափրկիչ Ղազանչեցոց տաճարի պատմաճարտարապետական ամբողջականությունը։
«Հատկանշական է, որ Ադրբեջանը Շուշիի Մայր տաճարի հետ կապված գործողություններ է իրականացնում՝ առանց Հայ առաքելական եկեղեցու հետ խորհրդակցելու, ինչն ակնհայտորեն խախտում է հայ հավատացյալների կրոնի ազատության իրավունքը»,- հայտարարել էին ՀՀ ԱԳՆ-ից։
Տաթև Ֆռանգյան
