15.12.2025 | 09:31
Երևանի քաղաքապետարանի գործակարգավարական նիստը. ՈՒՂԻՂ
Թուրքիան զգուշացրել է՝ Բայդենի կողմից Հայոց ցեղասպանության ճանաչումը կարող է խաթարել Հայաստանի հետ հարաբերությունների կարգավորումը
Քաղաքականություն
22.04.2021 | 22:43
Թուրքիան զգուշացնում է ԱՄՆ-ին, որ Հայոց ցեղասպանության ճանաչումը կարող է հետևանքներ ունենալ ու խոչընդոտել Հայաստանի հետ հարաբերությունների հնարավոր կարգավորման ջանքերին։ Այս մասին գրում է Middle East Eye-ը։
Նշվում է, որ մի շարք ամերիկյան պարբերականներ հրապարակումներ են արել այն մասին, որ ԱՄՆ նախագահ Ջո Բայդենը շաբաթ օրը խորհրդանշական ելույթում սպանությունների 106-րդ տարելիցին կճանաչի այն որպես «ցեղասպանություն»՝ դառնալով ԱՄՆ առաջին նախագահը, որը դա կանի։ Բացի այդ՝ Բայդենը դեռ հեռախոսազրույց էլ չի ունեցել իր թուրք գործընկերոջ՝ Ռեջեփ Թայիփ Էրդողանի հետ։
Հրապարակման մեջ ասվում է, որ թուրք պաշտոնյաները գտնում են, որ ԱՄՆ-ի այս քայլն անարդյունավետ կլինի ու ավելի կթուլացնի կապերը, որոնք արդեն իսկ վնասվել են հակասությունների պատճառով, այդ թվում՝ Անկարայի կողմից Անկարայի կողմից ռուսական S-400 համակարգերի գնման հետևանով։
Թուրք բարձրաստիճան պաշտոնյաներից մեկը լրատվամիջոցին ասել է, որ Լեռնային Ղարաբաղում ռազմական գործողությունների ավարտից հետո իրական հնարավորություն կա Հայաստանի ու Թուրքիայի միջև հաշտեցման։
«Մենք կցանկանայինք կարգավորել հարաբերությունները Հայաստանի հետ։ Մենք դրական շարժ ենք տեսնում և կարող ենք բացել սահմանները։ Եթե Ամերիկան 1915 թվականին իրադարձություններն անվանի «ցեղասպանություն» այս պայմաններում, դա կարող է սաբոտաժի ենթարկել Կովկասում ամբողջ գործընթացը»,- ասել է թուրք բարձրաստիճան պաշտոնյան։
Նա նաև նշել է, թե Էրդողանի արտաքին քաղաքական հարցերով խորհրդականը նույն մեսիջն անցյալ ամիս փոխանցել է ԱՄՆ ազգային անվտանգության հարցերով խորհրդական Ջեք Սալիվանին։
«Մենք հիշեցրել ենք, որ ցանկացած իրադարձություն կարող է «ցեղասպանություն» համարվել դատարանի որոշումից հետո, ինչպես եղել է Ռուանդայում ու Սրեբրենիցայում։ Ուստի չկա իրավական որևէ հիմք ԱՄՆ-ի այս ճանաչման։ Տերմինաբանությունը նույնպես ստեղծվել է Երկրորդ համաշխարհային պատերազմից հետո, 1915 թվականի իրադարձություններից տասնամյակներ անց»,- ասել է պաշտոնյան։
Լրատվամիջոցը նաև հիշեցնում է, որ ավելի քան 30 երկիր ճանաչել է Հայոց ցեղասպանությունը։ Պատմաբաններն ասում են, որ ավելի քան 1․5 մլն հայեր են սպանվել Օսմանյան կայսրության տարածքներում՝ համակարգված տեղահանությունների, սովի ու սպանությունների արդյունքում։
Էմմա Չոբանյան
