Ռուսաստանը պատժամիջոցներ է կիրառել ՀԴԲ-ի և ԱՄՆ ազգային հետախուզության ղեկավարների դեմ

Ռուսաստանն արգելում է ԱՄՆ ութ ​​քաղաքացիների մուտքը երկիր՝ ներառյալ ԱՄՆ գլխավոր դատախազը, ԱՄՆ ներքին անվտանգության նախարարը և ՀԴԲ տնօրենը, հայտնում է ՌԴ ԱԳՆ-ն:

«Ի պատասխան այս տարվա մարտի 2-ին ԱՄՆ վարչակազմի կողմից Ռուսաստանի պաշտոնատար անձանց նկատմամբ կիրառված պատժամիջոցների՝ Ռուսաստանի Դաշնություն մուտքը փակ է հետևյալ ամերիկյան ներկա և նախկին բարձրաստիճան պաշտոնյաների և գործիչների համար, որոնք մասնակցում են հակառուսական արշավին.

Մերիք Գարլանդ – ԱՄՆ գլխավոր դատախազ,

Մայքլ Կարվահալ – ԱՄՆ բանտերի Դաշնային բյուրոյի տնօրեն,

Ալեխանդրո Մալյորկաս – ԱՄՆ ներքին անվտանգության նախարար,

Սյուզան Ռայս – Միացյալ Նահանգների նախագահի ներքին քաղաքականության հարցերով խորհրդական, ՄԱԿ-ի նախկին դեսպան և ազգային անվտանգության օգնական,

Քրիստոֆեր Ռեյ – Հետաքննությունների դաշնային բյուրոյի տնօրեն,

Ավրիլ Հեյնս – ԱՄՆ ազգային հետախուզության տնօրեն։

Բացի այդ՝ արգելվել է Ազգային անվտանգության հարցերով նախկին խորհրդական Ջոն Բոլթոնի, ՄԱԿ-ում ԱՄՆ նախկին մշտական ​​ներկայացուցիչ և Կենտրոնական հետախուզական վարչության նախկին տնօրեն Ռոբերտ Ջեյմս Վուլսի մուտքը:

Հաշվի առնելով ռուս-ամերիկյան հարաբերություններում Վաշինգտոնի կողմից հրահրված բարդությունների աննախադեպ բնույթը՝ որոշվեց շեղվել սովորական պրակտիկայից և ռուսական կողմից ձեռնարկել հակաքայլեր»,- ասվում է գերատեսչության հայտարարության մեջ:

Հիշեցնենք, որ ավելի վաղ ԱՄՆ նախագահ Ջո Բայդենը նոր հակառուսական պատժամիջոցներ կիրառելու մասին հրաման էր ստորագրել։

Սահմանափակող միջոցառումները, մասնավորապես, կանդրադառնան Ռուսաստանի պետական պարտքի վրա: Նաև պատժամիջոցներ են սահմանվում 16 կազմակերպությունների և 16 ֆիզիկական անձանց նկատմամբ: Բացի այդ, Վաշինգտոնն արտաքսում է ԱՄՆ-ում ՌԴ դիվանագիտական առաքելության 10 աշխատակցի: