ՀՀ-ին պետք է սպառազինություն մատակարարվի նույն կազմաձևով, ինչ ՌԴ Զինված ուժերին է մատակարարվում․ Փաշինյան

Մենք շահագրգռված ենք, որպեսզի Հայաստանին սպառազինության ու զինամթերքի մատակարարումներն իրականացվեն այն կազմաձևով, ինչ ՌԴ Զինված ուժերին է իրականացվում։ Այս մասին «Ինտերֆաքսին» տված հարցազրույցում ասել է ՀՀ վարչապետ Նիկոլ Փաշինյանը։

«Հաշվի առնելով, որ ՀՀ տարածքում երկկողմ միջպետական համաձայնագրերի համաձայն ստեղծվել ու գործում են երկու հայ-ռուսական խմբավորումներ՝ Զորքերի (ուժերի) միացյալ խմբավորումն ու Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգը, բացի այդ՝ երկու երկրներն էլ հանդիսանում են ՀԱՊԿ անդամ, որի ձևաչափով ստեղծված են նաև զորքեր ու միավորված խմբավորումներ, հասկանալի է, որ Հայաստանը ծայրաստիճան շահագրգռված է Ռուսաստանից մատակարարումների հարցում, որպեսզի ունենա ժամանակակից ու, նախ և առաջ, ՌԴ ու ՀԱՊԿ այլ դաշնակիցների հետ համատեղելի սպառզինություն։ Հենց այս պատճառով էլ մենք շահագրգռված ենք, որպեսզի Հայաստանին սպառազինության ու զինամթերքի մատակարարումներն իրականացվեն այն կազմաձևով, ինչ ՌԴ Զինված ուժերին է իրականացվում»,- ասել է Փաշինյանը։

Անդրադառնալով հարցին՝ արդյո՞ք Հայաստանը պատրաստվում է նոր վարկ վերցնել ռուսական սպառազինություն ու ռազմական տեխնիկա գնելու համար՝ Փաշինյանը նշել է, որ նման որոշումները կկայացվեն՝ կախված բանակի բարեփոխումների արդյունքներից, որոնք այս պահին իրականացվում են։

«Այս փուլում իմաստ չեմ տեսնում քննարկել ֆինանսավորման աղբյուրներն ու համակարգը՝ առանձնացնելով դրանք նպատակներից և խնդիրներից, որոնք կկանխորոշվեն բանակի բարեփոխումների գործընթացում: Ինչ վերաբերում է ընթացիկ վարկային պարտավորություններին, ապա, իհարկե, դրանք պատշաճ և ժամանակին կսպասարկենք»,- եզրափակել է Փաշինյանը։

Տաթև Ֆռանգյան