19.02.2026 | 12:03
Կառավարության անդամների ճեպազրույցները. ՈՒՂԻՂ
Թուրքիան պետք է փոխի իր ագրեսիվ քաղաքականությունը Հայաստանի դեմ․ Նիկոլ Փաշինյան
Քաղաքականություն
06.04.2021 | 12:15
Հայ-ռուսական ռազմավարական հարաբերությունների բնույթը կախված չէ ապագա արտահերթ ընտրությունների արդյունքներից։ Ապրիլի 7-ին Մոսկվա կատարելիք աշխատանքային այցից առաջ «Ինտերֆաքսին» տված հարցազրույցում այս մասին հայտարարել է ՀՀ վարչապետ Նիկոլ Փաշինյանը։
«Հայ-ռուսական ռազմավարական հարաբերությունները բավական հարուստ ու ընդարձակ են։ Դրանք հիմնված են մեր բարեկամ ժողովուրդների պատմական մերձեցման վրա։ Այդ հարաբերությունների բնույթը կախված չէ ապագա արտահերթ ընտրությունների արդյունքներից»,- ասել է Փաշինյանը։
Անդրադառնալով հայ-թուրքական հարաբերություններին՝ նա հիշեցրել է, որ Հայաստանի ու Թուրքիայի սահմանը 1993 թվականին միակողմանիորեն փակվել է Թուրքիայի կողմից։
«Հայաստանը մշտապես կողմ է եղել Թուրքիայի հետ հարաբերությունների կարգավորմանը՝ առանց նախապայմանների, սակայն դա մերժվել է հենց Թուրքիայի կողմից։ Անկարայի նման թշնամական քաղաքականությունը նոր թափ է ստացել ընդդեմ Արցախի Ադրբեջանի սանձազերծած 44-օրյա ագրեսիայի ընթացքում։ Մասնավորապես, Թուրքիան Ադրբեջանին ուղիղ ռազմաքաղաքական ու ռազմատեխնիկական աջակցություն է ցուցաբերել՝ ԼՂ հակամարտության գոտի տեղափոխելով նաև օտարերկրյա զինյալ ահաբեկիչների։ Այս համատեքստում կայուն խաղաղության հաստատման ու տարածաշրջանում տնտեսական պատկերը վերականգնելու համար Թուրքիան պետք է փոխի իր ագրեսիվ քաղաքականությունը Հայաստանի դեմ»,- ասել է Նիկոլ Փաշինյանը։
Տաթև Ֆռանգյան
