Նիկոլ Փաշինյանը վարչական ռեսուրս է կիրառում, պետբյուջեի հաշվին նախընտրական խոստումներ տալիս. ՏԵՍԱՆՅՈՒԹ

Ընդդիմադիր քաղաքական գործիչները և քաղհասարակության ներկայացուցիչները տարակուսած են՝ Նիկոլ Փաշինյանը Հանրապետականների ոճով՝ վարչական ռեսուրսի կիրառմամբ նախընտրական քարոզարշավ է իրականացնում, ինչն կոշտ քննադատում էր հենց Նիկոլ Փաշինյանը: Դեռ տասը օր է անցել Փաշինյանի հայտարարությունից, որ հունիսի 20-ին նախատեսվում են արտահերթ ընտրություններ, և նախընտրական քարոզարշավը պաշտոնապես չի մեկնարկել, բայց Փաշինյանն արդեն հասցրել է շրջել շուրջ մեկ տասնյակ համայնքներում և համայնքային խնդիրների լուծման վերաբերյալ խոստումներ տալ:

Ընդդիմադիր պատգամավոր Անի Սամսոնյանը խնդրահարույց է համարում Փաշինյանի խոստումները՝ դա որակելով վարչական ռեսուրսի չարաշահում:

«Լուսավոր Հայաստան» խմբակցության պատգամավոր Անի Սամսոնյանը, որը քարոզարշավը ժամանակից շուտ սկսելու մեջ խնդիր չի տեսնում, այլ մտահոգություններ է հայտնում: Նրա կարծիքով՝ համայնքապետերը ստիպված են վարչապետին գյուղերում ջերմ ընդունելության արժանացնել, չքննադատել, որ չզրկվեն սուբվենցիոն ծրագրերից:

«Իմ քայլը» լքած պատգամավոր Թագուհի Թովմասյանը ևս Նիկոլ Փաշինյանին կոշտ քննադատում է՝ պնդելով, որ Փաշինյանը պետական բյուջեի հաշվին նախընտրական խոստումներ է տալիս:

Թագուհի Թովմասյանը խնդրահարույց է համարում նաև այն, որ Փաշինյանը, իր ձևակերպմամբ՝ այս նախընտրական հանդիպումներին ներկայանում է վարչապետի համար նախատեսված ավտոշարասյունով և անվտանգության աշխատակիցներով: Ընդդիմադիր Անի Սամսոնյանը, սակայն, խնդիր չի տեսնում, որ Փաշինյանն աշխատանքից դուրս պետական մեքենաներով է մարզեր գնում:

Իշխող թիմի ներկայացուցիչ, ԱԺ փոխնախագահ Ալեն Սիմոնյանն էլ իր հերթին չի հերքում, որ իշխանությունները քարոզարշավ են իրականացնում, իսկ որպես հիմնավորում նշում է՝ քարոզարշավը մեկնարկում է ընտրությունների հաջորդ օրվանից:

Ալեն Սիմոնյանը նաև վստահեցնում է՝ սրանք այն հանդիպումների տրամաբանական շարունակությունն են, որոնք վարչապետն իրականացնում էր մինչև համավարակն ու պատերազմը: Նիկոլ Փաշինյանի թիմակիցը, թեմայից շեղվելով, հատուկ շեշտում է՝ այս հանդիպումներն ապացուցում են, որ, իր ձևակերպմամբ՝ չարախոսների պնդումները, թե վարչապետը տեղաշարժվում է միայն ոստիկանական ուժերի ուղեկցությամբ, իրականությանը չեն համապատասխանում:

Մինչ Ալեն Սիմոնյանն արձանագրում է, որ Փաշինյանը մարզեր առանց ոստիկանական պատնեշների է այցելում, ԱԺ փոխխոսնակին հիշեցրեցինք՝ ֆեյսբուքյան լայվերի սիրահար Փաշինյանն այցերը, կարելի է ասել, գաղտնի է կատարում՝ լրատվամիջոցները դրանց մասին չեն տեղեկացվում, իսկ վերջում Կառավարությունը մոնտաժված տեսանյութեր է հրապարակում:

«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանն էլ ասում է, որ Նիկոլ Փաշինյանը քարոզարշավ անելով թեև օրենք չի խախտում, բայց վարչապետը չպետք է համատեղի աշխատանքային պարտականություններն ու նախընտրական քարոզչությունը, քանի որ դա ոչ մրցակցային պայմաններ է ստեղծում ընդդիմադիր թեկնածուների համար: Ըստ նրա՝ Փաշինյանը, վարչական ռեսուրսներ կիրառելով, հաճոյանում է սոցիալապես անապահով խավին և առավելություններ գրանցում:

Ընդդիմության և քաղհասարակության այս քննադատություններին, սակայն, իշխանությունները կարևորություն չեն տալիս: Ալեն Սիմոնյանն այսօր հայտարարեց՝ նմանատիպ հանդիպումներ էլի են լինելու։

Մանրամասները՝ տեսանյութում։

Նարեկ Կիրակոսյան