Բրիտանական BBC-ի լրագրող Ջոնա Ֆիշերն Արցախի գրավյալ տարածքներ այցելության ժամանակ պարզել է, որ հայկական մի եկեղեցի պարզապես անհետացել է․ այն հիմնահատակ ավերել են։ Խոսքը 2017 թվականին Մեխակավանում՝ Ջաբրայիլում օծված Սուրբ Աստվածածին եկեղեցու մասին է։
BBC-ի տեսանյութում նշվում է, որ Ադրբեջանը պնդում է, թե էթնիկ հայերը կարող են մնալ Լեռնային Ղարաբաղում, սակայն Հայաստանը Բաքվին մեղադրում է հայկական մշակութային ժառանգության ոչնչացման մեջ՝ ներառյալ եկեղեցիներն ու հուշակոթողները։ Երկու կողմերը միմյանց մեղադրում են ռազմական հանցագործություններում։
Լրագրողը, որը համացանցում տեսել է եկեղեցու տեսանյութը, թե ինչպես են ադրբեջանցիները գրավել Ջաբրայիլը և մի ադրբեջանցի պղծել է եկեղեցին, որոշել է փնտրել այն։ Տեղի ոստիկանն ասել է, որ տեղյակ չէ եկեղեցու մասին, սակայն քարտեզով հնարավոր է եղել տեղորոշել եկեղեցու գտնվելու վայրը։ Պարզվել է՝ այն չկա, հիմնահատակ ավերված է։ Լրագրողն անհետացած եկեղեցու պատկերները արդեն Բաքվում ցուցադրել է Ադրբեջանի նախագահի օգնական Հիքմեթ Հաջիևին, որն ասել է, որ տեղյակ չէ, կոորդինատները պետք է ստուգել։
Նշենք, որ ավելի վաղ էլ արբանյակային լուսանկարների շնորհիվ պարզվել էր, որ ադրբեջանցիներն ավերել են Շուշիի Կանաչ ժամ եկեղեցին։
Էմմա Չոբանյան
