Շարժական արագաչափերը՝ կանխարգելիչ գործի՞ք, թե՞ վարորդների «թալանի» նոր միջոց

Ճանապարհային ոստիկանությունն անակնկալ է պատրաստել վարորդների համար: Փետրվարի 8-ից սկսած կգործեն շարժական արագաչափեր: Ոստիկանության տարածած հաղորդագրության մեջ նշված է, որ շարժական արագաչափերի տեղադրման շարժառիթը Հայաստանում 2018 թվականին տեղի ունեցած ծանր հետևանքներով ճանապարհատրանսպորտային պատահարներն են, որոնց հիմնական պատճառներից մեկը արագության ռեժիմի խախտումն է:

Հիշեցնենք, որ նմանատիպ փորձ ճանապարհային ոստիկանությունն արդեն կիրառել է 2015 թվականին, Վարդառավի տոնին, որն առաջացրել էր քաղաքացիների դժգոհությունը:

Հայաստանում ներկայումս կա 178 ֆիքսված արագաչափ, իսկ շարժականը նախնական կլինի մեկը։ Այս մասին «Ազատության» հետ զրույցում հայտնել է ՃՈ պետի տեղակալ Արմեն Խաչատրյանը։

Անդրադառնալով վարորդների դժգոհություններին, թե իրենց թալանում են, պաշտոնյան կոչ է արել բոյկոտել ոստիկանության «թալանը» և խախտումներ թույլ չտալ: Վարորդի ընկեր ՀԿ-ի համահիմնադիր, ավագանու «Ելք» խմբակցության անդամ Սերգեյ Ղահրամանյանի կարծիքով՝ շարժական արագաչափերը ներդրվում են որպես զսպող մեխանիզմ, դրանց օգտակարությանը, սակայն, նա թերահավատորեն է մոտենում։

Վարորդների շահերի պաշտպանությամբ զբաղվող փորձագետը հիշեցրեց այս տարվա սկզբին արագության գերազանցման հետևանքով ավտովթարի զոհ դարձած ոստիկանության երկու աշխատակիցներին և կարծիք հայտնեց որ վերջին շրջանի մահացու ելքով վթարներն են դարձել նոր որոշում կայացնելու առիթ:

Իսկ թե ինչպես են վարորդները վերաբերվում այս նորամուծությանը՝ տեսանյութում:

Լիլիթ Շաբոյան