15.12.2025 | 21:13
Ալիևը համաներում է նախաձեռնում. այն կվերաբերի ավելի քան 20,000 մարդու
ՔՊ-ն՝ ՀՀԿ-ի սցենարով. Նիկոլ Փաշինյանը նույնպես անփոխարինելի՞ է որպես վարչապետ․ ՏԵՍԱՆՅՈՒԹ
Քաղաքականություն
22.03.2021 | 21:44
Հունիսի 20-ի արտահերթ ընտրությունների պայմանավորվածության ֆոնին խորհրդարանական ուժերն արդեն հստակեցնում են, թե ովքեր են գլխավորելու իրենց նախընտրական ցուցակները:
«Իմ քայլում» քննարկումներ չեն եղել, բայց արդարադատության նախարար Ռուստամ Բադասյանի համար միանշանակ ակնհայտ է, որ իշխող ուժն առաջնորդելու է Նիկոլ Փաշինյանը: Բադասյանին զարմացնում է հարցը, թե ինչպե՞ս են պատրաստվում ներկայանալ Փաշինյանի դեմքով, երբ նրա իշխանության օրոք պարտվել ենք պատերազմում և հիմա ունենք սոցիալ-տնտեսական ճգնաժամ:
Ի դեպ՝ մարտի 20-ին Նիկոլ Փաշինյանն Արագածոտնի մարզում հանդիպումներ է ունեցել մի քանի համայնքների բնակիչների հետ, նվերներ բաժանել երեխաներին, ինչն ընդդիմադիրներն ու իրավապաշտպանները չհայտարարված նախընտրական քարոզարշավի մեկնարկ են համարում:
«Իմ քայլից» Արփի Դավոյանը համամիտ չէ Փաշինյանի մարզային այցերը նախընտրական քարոզարշավ որակելու հետ: Նա վստահեցնում է՝ քաղաքացիները Փաշինյանի հետ հանդիպումների կարիք ունեն: Արփի Դավոյանի համար ևս նախընտրելի է, որ «Քաղաքացիական պայմանագիր» կուսակցության ցուցակը գլխավորի, իսկ մեծամասնություն ստանալու դեպքում՝ կրկին վարչապետ ընտրվի Նիկոլ Փաշինյանը: Ուշագրավ է, որ թեև նախընտրական բուն գործընթացը դեռ չի մեկնարկել, բայց ՔՊ-ականները հակված են վարչապետ տեսնել միայն Նիկոլ Փաշինյանին: Իշխող կուսակցությունում առկա այս իրավիճակը, կարծես, հիշեցնում է ՀՀԿ-ին, երբ 2018 թվականին պնդում էին՝ Սերժ Սարգսյանն անփոխարինելի է:
Նիկոլ Փաշինյանի թիմակիցն ասում է՝ քարոզարշավի ընթացքում քաղաքացիների հետ խոսելու են իրենց արած և չարած գործերի, հստակ պատկերացում են տալու ապագայի մասին: Արփի Դավոյանը հակված է կարծել, որ 2020 թվականին գրանցված բազմաթիվ խնդիրներ Փաշինյանի իշխանության մեղքով չի եղել:
«Լուսավոր Հայաստան» կուսակցությունում էլ փոփոխություն չկա: Էդմոն Մարուքյանի գլխավորած քաղաքական ուժը, որը հայտարարել է, թե ընտրություններին մասնակցում է՝ իշխանությունը վերցնելու նպատակով, վարչապետի թեկնածուն է առաջադրելու հենց Մարուքյանին: Այս մասին հայտնում է Գևորգ Գորգիսյանը և սուր քննադատում ՔՊ-ականներին՝ կրկին Փաշինյանի դեմքով ներկայանալու համար:
Գորգիսյանն արդարադատության նախարար Ռուստամ Բադասյանի հարցին պատասխաններ ունի, թե ինչու Փաշինյանին չպետք է առաջադրել վարչապետի թեկնածու:
ԲՀԿ-ի համար էլ անփոխարինել է Գագիկ Ծառուկյանը: Խմբակցության պատգամավոր Միքայել Մելքումյանն ասում է՝ տրամաբանությունը պահանջում է, որ վարչապետի թեկնածու լինի Գագիկ Ծառուկյանը: Մելքումյանը նաև ուշագրավ հայտարարություն է անում՝ պնդելով, որ անկախությունից հետո Հայաստանում ընտրությունների միջոցով երբևէ իշխանություն չի փոխվել, և առաջիկա ընտրություններն իշխանություն փոխելու լավագույն շանսն են: Նրանից հետաքրքրվեցինք՝ արդյո՞ք ԲՀԿ-ն էլ չի նպաստել այդ իրավիճակին, քանի որ, ըստ իրավապահների, կեղծիքների է դիմել:
Արտահերթ ընտրությունների անցկացման համար անհրաժեշտ է վարչապետ Նիկոլ Փաշինյանի հրաժարականը։ Օրը դեռևս հայտնի չէ՝ մինչ այս պահը Կառավարությունը որևէ տեղեկություն չի տրամադրել:
Մանրամասները՝ տեսանյութում։
Նարեկ Կիրակոսյան
