17.09.2026 | 16:17
Ալեն Սիմոնյանը ներկայացրել է Հայաստանի ազգային անվտանգության դոկտրինի հիմնական սկզբունքներն ու առաջնահերթությունները
Ադրբեջանի հետ կոռուպցիոն գործարքներում մեղադրվող գերմանացի պատգամավորը չվերթի ժամանակ մահացել է
Քաղաքականություն
22.03.2021 | 13:31
Բունդեսթագի պատգամավոր Կարեն Շթրենցը, որն իշխող Քրիստոնեա-դեմոկրատական դաշինքի անդամ էր, չվերթի ժամանակ մահացել է։ Գերմանական BILD պարբերականի փոխանցմամբ՝ նա Կուբայից Գերմանիա էր վերադառնում։
Նշվում է, որ Շթրենցն ինքնաթիռում կորցրել է գիտակցությունը։ Անձնակազմը որոշել է արտակարգ վայրէջք կատարել Դուբլինում, սակայն պատգամավորի կյանքը փրկել չի հաջողվել։ Հայտնի չէ, թե ինչու է Շթրենցը մեկնել Կուբա՝ մասնավո՞ր, թե՞ գործնական այցով։
Վերջին շրջանում Շթրենցի անունը կապվում էր Ադրբեջանի հետ կոռուպցիոն գործարքի հետ, նշվում էր, որ նա գումարներ է վերցրել Ադրբեջանի լոբբինգն անելու համար։ Հունվարին դատախազությունը նրա նկատմամբ հետաքննություն է սկսել։
Հավելենք, որ վերջերս Ադրբեջանի հետ կոռուպցիոն գործարքների մեջ մեղադրվող մի շարք գերմանացի պատգամավորների նկատմամբ հետաքննություն է սկսվել, իսկ Շթրենցն ադրբեջանական լոբբինգի ամենահայտնի ներկայացուցիչներից է։ Նրա գործունեության հետ կապված 2020թ․ հունվարին խուզարկություններ են կատարվել Շթրենցի կողմից տնօրինվող տարածքներում։ 2019թ․ մարտին էլ Կարեն Շթրենցը տուգանվել է 20․000 եվրոյով, քանի որ ժամանակին Բունդեսթագին չի տեղեկացրել Ադրբեջանից ստացվող հավելյալ եկամուտների մասին։
Շթրենցի հետ կապված կասկածներն առաջացել են դեռևս 2017 թվականին, ԵԽԽՎ-ում կոռուպցիոն սկանդալի ժամանակ։ Մասնավորապես, գերմանացի պատգամավորի անունը նշվում է 2018 թվականի ապրիլին հրապարակված անկախ փորձագետների՝ Եվրոպայում Բաքվի շահերը լոբբինգ անելու համար կաշառք ստանալու մասին զեկույցում։ Այդ պատճառով 2018թ․ սկզբին Շթրենցը չի ներգրավվել ԵԽԽՎ պատվիրակության կազմում։
Էմմա Չոբանյան
