09.06.2026 | 20:45
Մի քանի քվեն ու պատերազմի սպառնալիքը․ ինչպես վերահաշվարկը կարող է փոխել ապագա ԱԺ-ի պատկերը. ՏԵՍԱՆՅՈՒԹ
5 ամիս տևած հակադրության մեջ մեզ հաջողվել է խուսափել քաղաքացիական բախումներից. Նիկոլ Փաշինյան
Քաղաքականություն
20.03.2021 | 13:22
Արագածոտնի մարզ այցի շրջանակներում ՀՀ վարչապետ Նիկոլ Փաշինյանը մարտի 18-ին հանդիպեց Ներքին Բազմաբերդ համայնքի բնակիչների հետ: Ինչպես տեղեկացնում է «Արմենպրես»-ը, ՀՀ վարչապետը հանդիպումը սկսեց Արցախյան 44-օրյա պատերազմի ընթացքում զոհված բազմաբերդցիների հիշատակը հարգելով մեկ րոպե լռությամբ:
ՀՀ վարչապետը նշեց, որ գյուղում կան բազմաթիվ խնդիրներ, սակայն ինքը համոզված է, որ այսօր գյուղի բնակիչների ուշադրության կենտրոնում է Հայաստանում և Հայաստանից դուրս ստեղծված իրադրությունը: Նիկոլ Փաշինյանը կիսվեց մտքերով ստեղծված իրավիճակի հետ կապված:
«5 ամիս Հայաստանի Հանրապետությունը գտնվում է հետպատերազմյան վիճակում և հետպատերազմյան հակադրության մեջ: Գիտեք, որ ագրեսիվ ձևով իշխանությունը և կառավարությունը հարձակումների է ենթարկվել և շարունակում է ենթարկվել: Գիտեք, թե ինչպիսի ելույթներ և կոչեր են հնչում: Գիտեմ, որ շատերը այս իրադրության հետ կապված ունեն բազմաթիվ հարցեր, դժգոհություններ և պահանջներ: Բայց ես ուզում եմ մի փաստի վրա հրավիրել ձեր ուշադրությունը և արձանագրել այն վիճակը, որն աննախադեպ է, որովհետև այսպիսի ծանր պատերազմից հետո 5 ամիս տևած այդ հակադրության մեջ մեզ հաջողվել է խուսափել քաղաքացիական բախումներից»,- ասաց Փաշինյանը:
ՀՀ վարչապետի խոսքով` Հայաստանում կան ագրեսիվ ուժեր, որոնց ագրեսիվությունը օրըստօրե մեծանում է, սակայն ի շնորհիվ ժողովրդի հնարավոր է եղել խուսափել քաղաքացիական բախումներից:
«Ու սա այն պայմաններում, երբ ոմանք ուղիղ, առանց սեթևեթանքների սպանությունների, ահաբեկչական ակտեր իրականացնելու կոչեր են անում»,- ընդգծեց Փաշինյանը:
ՀՀ վարչապետը Բազմաբերդի բնակիչների ուշադրությանը հրավիրեց այն հանգամանքին, որ նույնիսկ որոշ դատավորներ խրախուսում են այդ սպանությունների կոչերը` իրավապահ մարմինները ձերբակալում են տվյալ անձանց, սակայն դատարանը կալանքի միջնորդությունը մերժում է և ազատ արձակում այդ անձանց:
«Գիտեմ, որ այս պահին ծագում է հետևյալ հարցը, իսկ ինչու մինչև հիմա Հայաստանում կան այդպիսի դատավորներ, որովհետև շատ արդարացի և ճիշտ հարց է: Ես հասկանում եմ, որ պետք է այս հարցին պատասխանենք և ինչն է պատճառը, որ նրանք դեռևս կան: Մենք մի շատ մեծ թերություն և մի շատ մեծ առավելություն ունենք: 2018 թվականին, երբ ձեր առջև կանգնել ենք և իրար հետ իրականացրել ենք հեղափոխություն, այն ժամանակ պարտավորություններ ենք ստանձնել, ասել ենք, որ պետական կառավարման համակարգում ջարդեր և վենդետաներ չեն լինելու: Մենք ասել ենք, որ յուրաքանչյուրը այս գործընթացի մեջ ունենալու է իր հնարավորությունը, և մենք սա ընկալել ենք որպես ձեր առաջ ստանձնած պարտավորություն և մենք հավատարիմ ենք մնացել այդ պարտավորությանը: Քաղաքական առումով, գուցե, սա հիմա պարզվում է մեծ սխալ է եղել, բայց բարոյական առումով չէինք կարող այդ պարտավորությունը ստանձնել և չկատարել: Մեր հեղափոխության հիմքում դրված է եղել քրիստոնեական արժեքները և սրա մեջ ոչ մի չափազանցություն չկա»,- ընդգծեց Փաշինյանը:
ՀՀ վարչապետի կարծիքով` հիմա ակնհայտ է, որ շատ շատերը այդ սահմանը հատել են, թե քաղաքական, թե բարոյական, թե իրավական առումով:
«Սա այն խնդիրն է, որ մեր առաջ կանգնած է: Այո, այս պայմաններում և այսօր կան մարդիկ և ուժեր, որոնք ուզում են Հայաստանում արյուն հեղվի: Ուզում են, որ Երևանի, Արագածոտնի փողոցներում արյուն հեղվի, որովհետև այդ մարդիկ դեռևս չեն հագեցել հոկտեմբերի 27-ի արյունով, Մարտի 1-ի արյունով, չեն հագեցել տասնյակ քաղաքական սպանությունների արյունով: Եվ այդ մարդիկ ուզում են Հայաստանը ներքաշել նոր արյունահեղության մեջ»,- եզրափակեց Փաշինյանը:
