Քաղաքականություն
17.03.2021 | 12:07Ես չեմ համարում, որ «Լուսավոր Հայաստանը» կողմ է արտահերթ ընտրություններին. ես համարում եմ, որ ԼՀԿ-ն գտնում է, որ ընտրություններ պետք չի անել և գտնելու է բազմաթիվ պատճառներ, որպեսզի խուսափի արտահերթ ընտրություններից՝ օգտագործելով այս ժամանակահատվածը իր դիրքը կարևորելու համար: Այս մասին, այսօր՝ մարտի 17-ին, ԱԺ-ում լրագրողների հետ զրույցում նշեց ԱԺ փոխխոսնակ Ալեն Սիմոնյանը:
«Լավ եմ ճանաչում իրենց գործելաոճը, գիտեմ, որ մշտապես ներկայացվում է մի տարբերակ, հետո փորձում են ինչ-որ պատճառների ու պայմանների բերումով այդ պայմանավորվածությունից կամ իրավիճակից խուսանավել, որը արդեն հայտնի գործելաոճ է: Ես նաև վստահ եմ, որ «Լուսավոր Հայաստանի» նաև այլ ընդդիմադիր գործիչներ այսօր իրականում չեն ուզում արտահերթ ընտրություններ, որովհետև իրենք գիտեն, որ իրենց գրեթե մեծամասնությունը չեն հաջողելու»,-նշեց Սիմոնյանը:
Դիտարկմանը, որ ընդդիմադիրներն էլ ասում են, որ իշխանությունը չի ուզում արտահերթ ընտրություններ, ԱԺ խոսնակն ասաց. «Բոլոր հարցումները և մարդկանց վերաբերմունքը խոսում է այլ բանի մասին: Եթե պարոն Մարուքյանն այդպիսի բան է ասում, կարող է իր համար ցանկալի դեսպանատան, ցանկալի կազմակերպության հարցմանն անդրադառնալ, կամ ինքը հարցում պատվիրել և տեսնել, թե որ դեպքում են իրենք հատում 1 տոկոսի շեմը»:
Հարցին, թե ինչու իշխանությունը չի ուզում ընդառաջ գնալ ընդդիմությանը և ընտրությունները կազմակերպել մինչև հունիսի 1-ը, Ալեն Սիմոնյանն արձագանքեց. «Ընտրության իմաստը քաղաքական դաշտում կայունություն բերելն է, իսկ դրա բաղադրիչ մասերից մեկն այն է, որ այսօր ԱԺ-ում ներկայացված քաղաքական ուժերը, նրանք նույնպես այդ պրոցեսին մասնակից լինեն: Իշխող ուժը արտահերթ ընտրությունների գնում է ներքաղաքական իրավիճակը լիցքաթափելու համար: Անել դա միանձնյա, քաղաքական առումով այնքան էլ ճիշտ չէ… Ժամկետների մասով որևէ հստակեցում չկա, քննարկում է տեղի ունենում իմ կողմից նշված ուժերի հետ, ուզում ենք, որ նաև իրենց համապատասխան լինեն ժամկետները:
Մենք նաև ունենք Ընտրական օրենսգրքի հետ կապված հարցեր, որոնք պետք է լուծվեն: Մենք բազմիցս ասել ենք, որ ռեյտինգային համակարգը պետք է փոխվի: Հիմա պետք է հասկանանք, թե որն է այսօր ավելի կարևոր: Այսինքն՝ ընտրությունները մի քիչ հետաձգենք, որ օրենսգիրքը փոխենք, թե՞ շուտ անենք ընտրություններ, բայց հին օրենսգրքով»:
Մանրաամսները՝ տեսանյութում:
