31.10.2026 | 22:55
Հայտնաբերվել է զինծառայողի դի. ՊՆ
Կոչ եմ անում՝ հարցերը լուծել խաղաղ ճանապարհով․ ԵԱՀԿ նախագահը՝ ՀՀ-ում ներքաղաքական ճգնաժամի մասին. ՏԵՍԱՆՅՈՒԹ
Քաղաքականություն
16.03.2021 | 12:18
ԵԱՀԿ գործող նախագահ, Շվեդիայի արտաքին գործերի նախարար Անն Լինդեն ընդգծում է, որ Լեռնային Ղարաբաղում հրադադարի մասին 2020թ. նոյեմբերի 10-ի համաձայնագրից հետո իրավիճակը տարածաշրջանում փոխվել է. նրա գնահատմամբ՝ հրադադարի համաձայնագրի իրականացումը հիմք կտրամադրի առաջ գնալու հակամարտության լուծման հարցում: Անն Լինդեն նման կարծիք հայտնեց ՀՀ ԱԳ նախարար Արա Այվազյանի հետ հանդիպումից հետո մամուլի համար հայտարարությունների ընթացքում:
«Ես ողջունում եմ հրադադարը և, առիթից օգտվելով, ուզում եմ արտահայտել իմ խորը ափսոսանքը վիրավորվածների և մահացածների կաակցությամբ… Որպես ԵԱՀԿ գործող նախագահ՝ ողջունում եմ Մինսկի խմբի համանախագահների աշխատանքը և մեր անձնական ներկայացուցչի ջանքերը՝ գտնելու երկարաժամկետ կայուն լուծում: Մի քանի հարցեր դեռևս կարոտ են լուծման: ԵԱՀԿ-ն և միջազգային հանրությունը որպես ամբողջություն կարևոր դեր ունեն անմիջական իրավիճակին անդրադառնալու և առաջ ընթանալու ճանապարհ գտնելու գործում»,- ասաց Լինդեն:
Նրա խոսքով՝ այս փուլում կարևոր է հարգանք դրսևորել միջազգային իրավունքի հանդեպ, ներառյալ՝ միջազգային մարդասիրական իրավունքը: Անն Լինդեն շեշտեց նաև վստահության կառուցման անհրաժեշտությունը: Նա նշեց, որ այս այցը հնարավորություն է ընձեռել քննարկել Շվեդիայի նախագահության առաջնահերթությունները ԵԱՀԿ-ում:
«Մենք մտադիր ենք խորացնել համագործակցությունը Հայաստանի հետ: Սա հստակ արտացոլվում է Երևանում մեր անմիջական ներկայությամբ, այսինքն՝ ռեզիդենտ դեսպան նշանակելով:
Տպավորված եմ Հայաստանում սկսված ժողովրդավարական բարեփոխումներով: Վերջին շաբաթների ընթացքում մենք տեսանք, թե որքան փխրուն կարող է այդ առաջընթացը լինել: Ես բոլոր կողմերին կոչ եմ հղում հարցերը լուծել խաղաղ ճանապարհով՝ հարգելով ժողովրդավարական գործընթացները և օրենքի գերակայությունը՝ ըստ ԵԱՀԿ-ի առջև ստանձնած պարտավորությունների»,- անդրադառնալով Հայաստանում տիրող ներքաղաքական իրավիճակին՝ եզրափակեց Անն Լինդեն:
Մանրամասները՝ տեսանյութում:
