Փաշինյանի հրաժարականի օրը մոտենո՞ւմ է. ԱԺ ընդդիմությունը համաձայն է նրա օրոք ընտրությունների գնալ․ ՏԵՍԱՆՅՈՒԹ

Ազգային ժողովի արտահերթ ընտրությունների անցկացման շուրջ քննարկումների վերջնականացումը կլինի առաջիկա օրերին: Factor TV-ի հետ զրույցում ասաց իշխող «Իմ քայլը» խմբակցության ղեկավար Լիլիթ Մակունցը՝ շեշտելով, որ իշխանությունները կողմ են կոնսենսուսով արտահերթ ընտրությունների գնալուն:

Տեղեկությունների ֆոնին, թե իշխանությունները ցանկանում են ընտրություններն անցկացնել աշնանը, Լիլիթ Մակունցն ասաց՝ այս պահին չի կարող հստակ նշել, թե երբ դրանք տեղի կունենան, քանի որ, ըստ նրա, դա որոշվելու է ընդդիմության հետ քննարկումների արդյունքում: Երեկ վարչապետի առանձնատանը «Իմ քայլի» և Նիկոլ Փաշինյանի միջև այս թեմայով քննարկում է եղել։ Լիլիթ Մակունցը փակ հանդիպումից մանրամասներ չհայտնեց:

«Լուսավոր Հայաստան» խմբակցության ղեկավար Էդմոն Մարուքյանն էլ, որը Փաշինյանի հրաժարականի դեպքում պատրաստվում էր առաջադրվել վարչապետի թեկնածու, այսօր ԱԺ-ում լրագրողների հետ զրույցում նոր պայման դրեց իշխանությունների առջև․ հայտարարեց՝ եթե մինչև հունիսի 1-ը արտահերթ ընտրությունները կայացած չլինեն, չի բացառում, որ դրանից հետո կրկին առաջադրվի վարչապետի թեկնածու:

Մարուքյանը պարզաբանեց՝ ժամկետը կարևոր է նրանով, որ  ներքաղաքական ճգնաժամն այնքան խորն է, որ պետք է արագ հանգուցալուծում տալ։ Որպեսզի Մարուքյանի սցենարը իրականություն դառնա, պետք է առաջիկա տասը օրվա ընթացքում խորհրդարանի լուծարման կամ իրավունքի ուժով արձակվելու գործընթաց սկսվի․ այն է՝ Նիկոլ Փաշինյանի հրաժարական և երկու անգամ նոր վարչապետի ընտրության ձախողում:

Մարուքյանի նոր պայմանը Լիլիթ Մակունցը լսել է, բայց իշխանությունն իր դիրքորոշումը կհայտնի քննարկումներից հետո: Այնուհանդերձ, «Լուսավոր Հայաստան» խմբակցության ղեկավար Էդմոն Մարուքյանն իշխանությունների մոտ տեսնում է արտահերթ ընտրությունների գնալու կամք։

ԱԺ ընդդիմադիր մյուս ուժը՝ ԲՀԿ-ն, որը նաև Հայրենիքի փրկության շարժման մաս է կազմում, նույնպես կողմնակից է Փաշինյանի հրաժարականից անմիջապես հետո արտահերթ ընտրությունների անցկացմանը: Հիշեցնենք՝ ՀՓՇ-ի պայմանն էր, որ Փաշինյանի հրաժարականից հետո մինչև մեկ տարի Հայաստանը ղեկավարի Վազգեն Մանուկյանը, նոր միայն անցկացվեն ընտրություններ:

ԲՀԿ խմբակցության քարտուղար Արման Աբովյանն այսօր հայտարարեց, որ Գագիկ Ծառուկյանն ասել է՝ վարչապետի հրաժարական, ապա՝ հնարավորինս շուտ արտահերթ ընտրություններ: Աբովյանից հետաքրքրվեցինք՝ արդյո՞ք ԲՀԿ-ն համաձայն է Նիկոլ Փաշինյանի վարչապետության պարագայում արտահերթ ընտրություններին գնալ և արդյո՞ք սա չի նշանակում, որ ԲՀԿ-ն շեղվում է ՀՓՇ-ի օրակարգից: Արման Աբովյանը, սակայն, հստակ պատասխան չտվեց:

Այնուամենայնիվ, Հայրենիքի փրկության շարժման մաս կազմող կուսակցությունների մեջ հակասություն կա: Դաշնակցության Հայաստանի Գերագույն մարմնի ներկայացուցիչ Իշխան Սաղաթելյանը, որը նաև Հայրենիքի փրկության շարժման համակարգողն է, ի տարբերություն ԲՀԿ ղեկավար Գագիկ Ծառուկյանի՝ բացառում է, որ Փաշինյանի իշխանության օրոք ընտրությունների կմասնակցեն: Սաղաթելյանը նաև կարծում է, որ Գագիկ Ծառուկյանը Նիկոլ Փաշինյանի հետ հուշագիր չի ստորագրի:

Մանրամասները՝ տեսանյութում։

Նարեկ Կիրակոսյան