«Հարցը լուծման ռելսերի վրա է». Երևանում վթարայինների խնդիրը կլուծվի․ կառավարության առաջարկը. ՏԵՍԱՆՅՈՒԹ

Կառավարությունը հավանություն տվեց «ՋիԷմ Քոնսթրաքշն» ՍՊԸ-ին ուղղակի վաճառքի ձևով հողամաս օտարելուն համաձայնություն տալու մասին որոշման նախագծին:

Տարածքային կառավարման և ենթակառուցվածքների նախարար Սուրեն Պապիկյանը տեղեկացրեց, որ նախագծով առաջարկվում է համաձայնություն տալ Երևանի Շինարարների փողոցի 23/9 հասցեի համայնքային սեփականություն հանդիսացող 0.02 հա մակերեսով հողամասը բազմաբնակարան բնակելի շենք կառուցելու նպատակով «ՋիԷմ Քոնսթրաքշն» ՍՊԸ-ին ուղղակի վաճառքի ձևով օտարելուն և հավանություն տալ ընկերության կողմից ներկայացված ներդրումային սոցիալական ծրագրին:

«Ծրագիրն իրականացվելու է երկու փուլով, կառուցվելու է երկու բազմաբնակարան շենք: Առաջին փուլում ընկերությունը պարտավորվում է սեփականության իրավունքով իրեն պատկանող Շինարարների փողոցի 23/1 հասցեում կառուցվող բազմաբնակարան շենքից տրամադրել մոտ 2000 քմ մակերեսով բնակելի տարածք՝ Շինարարների փողոցի 23 հասցեում բնակվող 3-րդ կարգի վթարային շենքի բնակիչներին վերաբնակեցնելու նպատակով: Այս փուլում նախատեսվում է կառուցել 11556 քմ ընդհանուր մակերեսով 18 վերգետնյա և 2 ստորգետնյա հարկ ունեցող բազմաբնակարան բնակելի շենք, որն ունենալու է 94 բնակարան և 22 ստորգետնյա ավտոկայանատեղի:

Երկրորդ փուլում կապամոնտաժվի Շինարարների փողոցի 23 հասցեում գտնվող 3-րդ կարգի վթարային շենքը, և տեղում կկառուցվի 16408 քմ մակերեսով 18 վերգետնյա և 2 ստորգետնյա հարկ ունեցող բազմաբնակարան բնակելի շենք… Ծրագիրը կարևոր է Երևանի բնակֆոնդը թարմացնելու համար»,- նշեց նախարարը:

«Հարցը լուծման ռելսերի վրա է դրված. Երևանում վթարային շենքերի խնդիրը կլուծվի․զարգացումները կբերեն նրան, որ մարզերում նույնպես այս խնդիրը կլուծվի»,- նշեց վարչապետ Նիկոլ Փաշինյանը:

Մանրամասները՝ տեսանյութում: