03.03.2026 | 19:21
Իսրայելը և ԱՄՆ-ն հարվածել են Իրանի նոր գերագույն առաջնորդ ընտրելու համար նախատեսված մարմնի շենքի. ՏԵՍԱՆՅՈՒԹ
Արցախում գարնանացանի ցուցանիշը, նախորդ տարվա համեմատ, 95 տոկոսով նվազել է
Հասարակություն
09.03.2021 | 22:24
Արցախում մեկնարկել են գարնանացանի աշխատանքները, սակայն դրանց ծավալը, նախորդ տարվա համեմատ, կրճատվել է 95 %-ով։ Այս մասին տեղեկանում ենք Արցախի ազգային վիճակագրական ծառայության հրապարակած տվյալներից։
Այս տարի մինչև մարտի 9-ը, ընդհանուր առմամբ, գարնանացանի աշխատանքներ են կատարվել 46 հեկտար տարածքում՝ նախորդ տարվա 922,1 հեկտարի փոխարեն։ Մասնավորապես՝ 82․6%-ով կրճատվել է հացահատիկային ցանքը, կարտոֆիլի ցանքը՝ 90․9 տոկոսով։ Այս տարի, ի տարբերություն նախորդ տարվա, չի կատարվել եգիպտացորենի, հնդկացորենի, հատիկաընդեղենի, բանջարեղենի, բոստան-պարենային, տեխնիկական, կերային մշակաբույսերի ցանք։
Գարնանացանը մեկնարկել է միայն Ասկերանի շրջանում՝ 46 հեկտար տարածքում՝ նախորդ տարվա 247.1 հեկտարի փոխարեն։
Արցախի գյուղատնտեսության նախարարությունից Factor.am-ին փոխանցեցին, որ գարնանացանի ծավալների նման կրճատումը կապված է տարածքների կորստի հետ։
«Ասկերանի շրջանում ևս, հիմնականում հարթավայրային գոտին, ոռոգվող տարածքները, որ ավելի վաղ գարնանացանն էր արվում, հիմա այդ տարածքը վերահսկողությունից դուրս է»,- նշեց Արցախի Գյուղատնտեսության նախարարության բուսաբուծության և բույսերի պաշտպանության բաժնի պետ Արամ Բադալյանը:
Ինչ վերաբերում է այն մշակաբույսերին, որոնց ցանքսն այս տարի չի իրականացվել, նախարարության պաշտոնյան նշեց՝ դա ևս տարածքների կորստի հետ է կապված, սակայն առաջիկայում ուշ ցանքս կկատարվի։
«Նոր է սկսվում, եղանակը նոր է բացվում, այդ կուլտուրաների ցանքսի համար եղանակը դեռ նպաստավոր չէ։ Ավելի ուշ ցանքս կկատարվի։ Հարթավայրային գոտում էլ տարածք չունենք վաղ ցանքս կատարելու համար»,- նշեց նա։
Հիշեցնենք՝ 2020 թվականի սեպտեմբերի 27-ին ադրբեջանական կողմը մարտական գործողություններ սկսեց Արցախում և օկուպացրեց դրա մեծ մասը, այդ թվում՝ Շուշի քաղաքը։
Անժելա Պողոսյան
