Հունվարին հանցագործությունների աճ է գրանցվել․ կրկնապատկվել են հրազեն, ռազմամթերք պատրաստելու և ապօրինի շրջանառության դեպքերը

2021 թվականի հունվարին Հայաստանում գրանցվել է 1654 հանցագործության դեպք։ Այս մասին տեղեկանում ենք Պետական վիճակագրական ծառայության հրապարակած տվյալներից։

Կատարված հանցագործությունները, նախորդ տարվա նույն ամսվա համեմատ, ավելացել են 98-ով կամ 6․2%-ով։ 12-ով (1.5 %) ավելացել են ոչ մեծ ծանրության հանցագործությունները, 34-ով (7%)՝ միջին ծանրության հանցագործությունները, ծանր հանցագործություններն ավելացել են 42-ով (15․6%), առանձնապես ծանր հանցագործությունները՝ 6-ով (42%):

Հասարակական անվտանգության, հասարակական կարգի և բնակչության առողջության դեմ ուղղված հանցագործությունների 237 դեպք է գրանցվել՝ նախորդ տարվա նույն ամսվա համեմատ ավելանալով 23-ով կամ 9%-ով։ Հրազեն, ռազմամթերք պատրաստելու և ապօրինի շրջանառության 20 դեպք է գրանցվել, որը 2 անգամ ավելի է նախորդ տարվա նույն ամսվա համեմատ։

Գրեթե կրկնապատկվել են թմրամիջոցների հետ կապված հանցագործությունները՝ կազմելով 66 դեպք՝ նախորդ տարվա նույն ամսվա 37 դեպքի համեմատ։ Ավելացել են նաև սեփականության դեմ ուղղված հանցագործությունները, տնտեսական գործունեության դեմ ուղղված հանցագործությունները, գողության, խուլիգանության դեպքերը, ինչպես նաև պետական իշխանության, ծառայության և կառավարման կարգի դեմ ուղղված հանցագործությունները։

Նվազել են ճանապարհային երթևեկության և տրանսպորտային միջոցների շահագործման կանոնները խախտելու դեպքերը, այդ թվում՝ մահվան ելքով ավարտված, խուլիգանության դեպքերը։

Անժելա Պողոսյան