Ինչ է կատարվում Ազատամուտում. ադրբեջանցիների ենթադրյալ այցի հետքերով. ՏԵՍԱՆՅՈՒԹ

Տավուշի մարզի Ազատամուտ և Այգեհովիտ համայնքների բնակիչները հերքում են տեղեկությունները, թե երեկ, իբր, ադրբեջանցիներ են եկել գյուղերի վարչական տարածք և չափագրումներ իրականացրել: Այս մասին նրանք վստահեցրին Factor TV-ի հետ զրույցում:

Հիշեցնենք՝ երեկ նախկին վարչապետ Հրանտ Բագրատյանը տեղեկություն տարածեց, թե «ադրբեջանցի «խաղաղապահ զինծառայողները» չափագրումներ են կատարում Տավուշի մարզի Ազատամուտ համայնքում՝ նախկին Բարխուդարլիի մերձակայքում, արդեն մոտեցել են մեր շատ հայրենակիցների և «շատ քաղաքավարի» ասել՝ «ձեր գոմերն ու տները կտանեք գետից այն կողմ»: Ավելի ուշ սոցիալական ցանցերում օգտատերերը գրեցին, թե, իբր, «Իջևանի ու Շամշադինի ճակատային հատվածում թուրք-ադրբեջանական ծանր տեխնիկայի կուտակումներ են»: Այս տեղեկությունները պաշտոնապես հերքվեցին:

Factor TV-ն այսօր տեսանկարահանումներ է իրականացրել այն տարածքներում, որտեղ իրականացվել են ադրբեջանցիների կողմից ենթադրյալ չափագրումները: Մեր նկարահանումների ընթացքում ազատամուտցիները նշյալ տարածքներում գյուղատնտեսությամբ էին զբաղվում: Նրանք վստահեցրին, որ իրենց որևէ մեկը չի արգելել այդ տարածքներում անասնապահությամբ զբաղվել:

Ուշագրավ է, սակայն, որ ազատամուտցիները չհերքեցին Տավուշում ռուս խաղաղապահների առկայությունը: Նրանցից առնվազն երկուսը հաստատեցին այդ տեղեկությունը: Երեկ ՊՆ-ն հերքել էր, թե Տավուշի մարզի մի քանի գյուղերի տարածքում «արդեն երկու օր է՝ մոտ 500 ռուս խաղաղապահներ և ադրբեջանցիներ սահմանի երկայնքով չափագրումներ են անում»:

Ազատամուտում կյանքը, ընդհանուր առմամբ, ընթանում է բնականոն հունով: Իսկ համայնքի խաղահրապարակը լի էր ֆուտբոլ խաղացող երեխաներով:

Մանրամասները՝ տեսանյութում:

Նարեկ Կիրակոսյան